बुंगद्यः याः न्यात

यल – बुंगःद्यः जात्राया झ्वलय् थौं न्हिनय् बुंगद्यःयात सोह्रखुट्टे तक सालाः याः न्यायेकूगु दु । थौं न्हिनय् पौन ५ बजे सामाजिक दूरी कायम यासें स्वयंसेवकतय्सं बुंगद्यः साःगु खः । बुंगद्यः सालेगु निंतिं जात्रालिसे सरोकारवाला ज्यापु समाजया लिसें १९ गू खलःपुचःतय्सं स्वयंसेवकत खटे याःगु खः ।

थौं बुंगद्यःया खःयात १५–२० मिटरति जक सालाः याः न्यायेकूगु खः । वंगु बिहिवाः बुंगद्यः सालेमाःगु माग यानावःपिंसं पुल्चोकय् तयातःगु बुंगद्यःयात साला हयेवं जूगु झडप लिपा थौं यल महानगरपालिकाया लिक्क लाःगु सोह्रखुट्टे पाटी तक सालाः याः न्यायेकूगु खः । द्यः सालेवं यलय् च्वंपिंसं थौं हे छ्वयलाभू न्यायेकूगु दु ।

द्यः सालेगु झ्वलय् कोरोना संक्रमणपाखें सुरक्षित जुइगु निंतिं मापदण्ड पूवंकाः द्यः साःगु खः । द्यः साःपिं सकसिनं छगू हे कथंया सर्ट फिनावःगु खःसा ल्हातय् पंजा न्ह्यानाः, क्याप व भाइजर तयाः द्यः साःगु खः । द्यः सालेगु झ्वलय् नं भौतिक दूरी कायम यायेगु निंतिं ३–३ फिटया दूरी कायम यानाः च्वंगु खः ।

द्यः सालेगु झ्वलय् विधि पूवंकेगु निंतिं गुर्जुया पल्टनया लिसें बाजं खलःत नं वःगु खः । द्यः याः न्यायेवं गुर्जुया पल्टनपाखें तोप नं मुइकूगु खः ।

ज्यापु समाजया नायः चन्द्र महर्जनं द्यः सालेगु निंतिं थीथी खलः पुचःपाखें ५०१ म्ह स्वयंसेवक खटे जुइगु खँ कनादीगु दु । यल जिल्ला प्रशासनं जानकारी बिउगु कथं द्यः सालेगु निंतिं ४३४ म्ह मनूत सहभागी जूगु खः । द्यःसालेगु निंतिं जात्रा व्यवस्थापनपाखें बिउगु नांधलः कथं १६० म्ह द्यः सालीपिं, १२४ म्ह स्वयंसेवक, २८ म्ह बाजं थाइपिं व समाज व खलः पुचःया थीथी पदाधिकारीपिं १२२ म्ह यानाः ४३४ म्ह सहभागी दु । म्हो जक मनू तयाः द्यः सालेगु धाःसां छुं भचा हूलमूल धाःसा खनेदुगु खः ।

बुंगद्यःयात साले न्ह्यः चाकुबहाद्यःयात नं गाःबहालं निसें साला हयाः यल महानगरपालिकाया न्ह्यःने थ्यंकेहःगु खः । वंगु बिहिवाः हे चाकुबहाःद्यःयात नं सालाः गाःबहाः तक हयातःगु खः ।

कोरोना महामारीया कारणं द्यःयात विधिपूर्वक यल देय् चाःहिके मफइगु जुइवं शुक्रवाः क्षमा पुजा यानाः थौं छक्वः द्यः सालाः जात्रा क्वचायेकूगु खः । आः कन्हय् हे द्यः भुज्या यानाः द्यःयात लित बिज्याकेगु निंतिं साइट स्वइगु जूगु दु । ज्योतिषतय्सं बिउगु साइट कथं द्यःयात बुंगःय् लित बिज्याकी । मलमासया कारणं द्यःयात याकनं बुंगय् लित बिज्याकेमाःगुलिं २६ गते तकया दुने हे द्यःयात बुंगय् लित बिज्याकेगु तयारी जुयाच्वंगु दु ।