कोरोनां कयाः कांग्रेसया २१ वडा सभापति रञ्जित मंत

येँ – रञ्जितकार समाजया न्वकु लिसें नेपाली कांग्रेस येँ मनपा २१ वडाया सभापति गोविन्द रञ्जित कोरोना ल्वचं कयाः थौं मंगलवाः मंत । वयकः ६७ दँ दुम्ह खः । छुं न्हि न्ह्यः कोरोना संक्रमण पुष्टि जुइवं वयकःयात बलम्बुस्थित सशस्त्र प्रहरीया अस्पतालय् वासः याकातःगु खः । वयकःयात अस्पताल यंकेवं हे भेन्टिलेटरय् तयाः उपचार शुरु याःगु खःसां वासः याकुयाकुं वयकः मदुगु खँ पारिवारिक सूत्रं धाःगु दु ।

पारिवारिक सूत्रं धाः कथं भाजु रञ्जितयात थःहे कायपाखें कोरोना संक्रमण जूगु खः । वयकःया कायभाजु छुं ई न्ह्यः तिनि विरगञ्जं लिहां वःगु खःसा कोरोनाया संकेत खने दयेवं परीक्षण याःबलय् पोजिटिभ पिहां वःगु खः । वयां लिपा रञ्जितया परीक्षण याःबलय् वयकःयात नं पोजिटिभ खने दुगु खः । तर पोजिटिभ खने दुसां अस्पतालं छेँय् हे च्वनाः वासः यानाच्वंसां जिउ धकाः लित छ्वया हःगु खः । छुं न्हि न्ह्यः स्वास्थ्य झन् स्यना वनेवं वयकःयात अस्पताल भर्ना याःगु खः ।

वंगु स्थानीय चुनावय् वडा अध्यक्षया प्रतिस्पर्धी समेत जुयादीम्ह भाजु रञ्जित नेपाली कांग्रेसया पुलांम्ह कार्यकर्ता लिसें समाजसेवी नं खः ।