वल्र्ड नेवाःया स्वक्वःगु तःमुँज्याय् येँय्
येँ – हलिं नेवाः दबू (वल्र्ड नेवाः अर्गनाइजेशन)या स्वक्वःगु तःमुँज्यां थ्वहे वइगु चिल्लागा अष्टमी निसें दशमी (मार्च २८ निसें ३०) तक येँय् जुइगु जूगु दु । तःमुँज्याय् नेपाःया लिसें विश्वया थीथी देय्या प्रतिनिधि यानाः न्यासःम्हेसिनं ब्वति काइगु खँ धाःगु दु ।
म्हिगः छगू पत्रकार सम्मेलन यासें बिउगु जानकारी कथं तःमुँज्याया झ्वलय् उद्घाटन सत्रया लिसें नेवाःतय्त वयाच्वंगु समस्यायात कयाः प्यंगू थीथी विषयय् प्यानल डिस्कस, साँस्कृतिक ज्याझ्वः, नेवाः भ्वय्, नेवाः एकता ¥याली, लुमन्ति पौ पिथनेगु, झिम्ह नेवाः व्यक्तित्वपिंत सम्मान यायेगु ज्या नं जुइ । तःमुँज्या कजि पुष्करभक्त माथेमां थुगुसी नीगुलिं मल्याक देय्या प्रतिनिधिपिंसं तःमुँज्याय् ब्वति काइगु खँ कनादिल ।
थुगुसी जुइगु तःमुँज्यां हलिं नेवाः दबूया न्हूगु नेतृत्व नं ल्यइगु जुइ । अमेरिकाया बाल्टिमोरय् मू ज्याकु दुगु हलिं नेवाः गुथिपाखें थौंकन्हय् गुंगू थीथी देशय् मूकवः गठन यायेधुंकूगु दुसा झिंन्यागू देशय् प्रतिनिधि ल्यया तयेधुंकूगु दु ।
महाधिवेशनया लिपांगु न्हि कुन्हु विशेष ज्याझ्वः यासें हलिं नेवाः दिं नं हनी । हलिं नेवाः दबुलिं थगुने विश्व नेवाः सम्मेलन यासें मार्चया अन्तिम शनिवाःयात हलिं नेवाः दिं कथं हनेगु घोषणा याःगु खः ।
LEAVE YOUR COMMENTS