गुथि संस्थानया प्रमुख प्रशासकय् किरण शाक्य
येँ – भाषिक आन्दोलनया अभियन्ता लिसें नेपालभाषा मंकाः खलः यलया पुलांम्ह नायः किरण शाक्य गुथि संस्थानया प्रशासकीय अधिकृत (सीईओ) नियुक्त जुयादीगु दु। म्हिगः वय्कःयात भूमिसुधार मन्त्री लक्ष्मणलाल कर्णपाखें पद व गोपनीयताया शपथ ग्रहण याकादीगु खःसा म्हिगः
हे संस्थानया ज्याकुथी पदभार नं ग्रहण यानादीगु खः ।
संस्थानय् वय्कःयात गुथि संस्थान सञ्चालक समितिया अध्यक्ष पूण्यप्रसाद भुषालं लसकुस यानादीगु खः । शपथ ग्रहण लिपा मन्त्री कर्णं गुथि संस्थानयात चलायमान यायेगु लागिं सरकारपाखें थ्व नियुक्ति याःगु खः धासें थुकियात सकल जनताया हित जुइकथं न्ह्याकेगु जिम्मा आः प्रशासकीय अधिकृत शाक्यया ब्वहलय् वःगु खँ कनादिल ।
पद बहाली लिपा नेपालभाषा टाइम्स’ लिसे खँ ल्हासें न्हूम्ह प्रशासकीय अधिकृत शाक्यं गुथि संस्थानयात भूमिसुधार मन्त्रालय अन्तर्गत तयातःगु
जूगुलिं थुकिया अप्वः ध्यान संस्कृति संरक्षणय् मवँसे जग्गाय् जक वनाच्वंगुलिं उकियात व्यवस्थित यायेत थम्हं कुतः यायेगु खँ कनादिल ।
अथे हे विवादय् वयाच्वंगु गुथि सम्बन्धी विधेयकया समस्या समाधान याना वनेगु नं थःगु प्राथमिकताया विषय जुइगु खँ वय्कलं कनादिल । वय्कलं धयादिल, ।।।गुथि विधेयक सम्बन्धी आन्दोलनया अभियन्ता लिसें सम्बन्धित गुथितलिसे च्वनाः वय्कःपिनिगु हे सल्लाह कथं थ्व समस्या ज्यंकेगु जिगु मू कुतः जुइ ।’ अथे हे स्वनिगःया नेवाः लगायत देय्या थीथी लागाय् च्वंगु संस्कृतित न्ह्याकेगु ज्याय् गुथिपाखें याना वयाच्वंगु ज्यायात चुस्त दयेकेगु व अज्याःगु संस्कृति हनेज्याय् वयाच्वंगु आर्थिक लगायतया सकस्यात समाधान यायेगु नं थःगु प्राथमिकताया विषय जुइगु खँ वय्कलं कनादिल ।
LEAVE YOUR COMMENTS