मदुम्ह शर्माया ‘उपन्यासया चाकलय् गिरिजा’ पिदन

येँ- मदुम्ह इतिहासविद् सह प्राध्यापक गोवद्र्धन शर्मां झिंप्यदँ न्ह्यः च्वयादीगु समालोचना सफू ‘उपन्यासया चाकलय् गिरिजा’ पिदंगु दु । राजोपाध्याय समाजया ग्वसालय् वंगु शुक्रवाः नेपाः ब्यांक्वेटय् जूगु ज्याझ्वलय् सफूया पितब्वज्या याःगु खः ।

नेपालभाषा साहित्य ख्यःया छगः नक्षत्र महाकवि गिरिजाप्रसाद जोशीं च्वयादीगु उपन्यासतय्गु समालोचना यानाः मदुम्ह सहप्राध्यापक शर्मा च्वयादीगु समालोचनात्मक सफूया नेवाः देय् दबूया नायः पवित्र वज्राचार्य, वरिष्ठ समालोचक पूर्ण ताम्राकार, ईलोह प्रकाशनया प्रबन्ध निर्देशक नरेशवीर शाक्य लगायतया पाहांपिंसं उगु सफूया पितब्वज्या यानादीगु खः ।

ज्याझ्वलय् वरिष्ठ समालोचक ताम्राकारं नेपालभाषा साहित्य ख्यलय् महाकवि गिरिजाप्रसादया योगदानयात कयाः चर्चा यानादिसें पितब्वज्या जूगु सफुतिं इतिहासविद् शर्मायाके सच्चा समलोचनाया खुबी दुगु प्रमाणित यानादीगु विचाः तयादिल ।

ईलोहं प्रकाशनया निर्देशक शाक्यं महाकवि गिरिजाप्रसादयात साहित्य ख्यलय् पागल कवि धाइगु धासें वय्कः छम्ह थःगु मनय् लूगु भावनायात गथे खः अथे हे च्वयादीम्ह स्वच्छन्दवादी कवि जूगु विचाः तयादिल ।

नेवाः जातीय महासंघया अध्यक्ष मनोज नेवाः खड्गीं समाजं थःगु म्हसीका ल्यंका तयेत भाषा, संस्कृतिया संरक्षणय् विशेष ध्यान बीमाःगु खँय् बः बियादिल ।

मदुम्ह शर्माया काय सुभाष शर्मां थः अबु दिवंगत जूगु १४ दँ लिपा जूसां वय्कलं च्वयादीगु सफू पिथने खंगुलिं लय्ताःगु खँ कनादिल ।
ज्याझ्वलय् कोरोना महामारीया इलय् संक्रमितया उपचारय् खटे जूपिं राजोपाध्याय स्वास्थ्यकर्मिलिसें २०७६ व ०७७ या एसइइ परीक्षा उत्तीर्ण समाजया विद्यार्थीपिंत नं हनेज्या याःगु खः । ज्याझ्वःया झ्वलय् नेपाःया धर्म, संस्कृति, संस्कारलिसे वेद, मन्त्र सम्बन्धी सफूया नं ब्वज्या याःगु खः ।