थँबहिलिइ मुनाः पंजरां काः वनीगु
येँ(नेपालभाषा टाइम्स)- थौं गुंलागा जुगःचः¥हे । नेवाः बौद्ध मार्गीतय् तःधंगु पर्व पंजरां । नेपाल परम्परागत बौद्ध धर्म संघया ग्वसालय् दँय्दसं थें थुगुसी नं सकले शाक्य वज्राचार्यपिं छथाय् हे मुनाः मंकाःकथं पंजरां फः वनीगु दु ।
संघपाखें मंकाःकथं व्यवस्थित रुपं पंजरां फः वनेगु निंतिं भीमरत्न वज्राचार्यया संयोजकत्वय् मंकाः पंजरां मूल समिति–११४४ नं नीस्वंगु दु । थुगुसी थनया थँबहिलिइ मुनाः पंजरां फः वनेगु समितिं जानकारी बिउगु दु ।
‘परम्परागत बौद्ध नखः पंजरां झःझः धायेक हने, सांस्कृतिक परम्परा संरक्षण यानाः झीगु म्हसीका ल्यंकातये’ धइगु नारा बियातःगु थुगुसीया मंकाः पंजरां फः वनेगु ज्याझ्वः सुथसिया ८ ताः इलय् न्ह्याइगु संघं जानकारी बिउगु दु ।
थँबहिलिइ मुनाः न्ह्याइगु मंकाः पंजरां क्वाःबहाः, झ्वाःबहाः, तंलाछि, ध्वाखाबहाः (जलपान), गंबहाः, नघः÷श्रीघः, न्हूबहाः (थाय्मदु), असं, दगु बहाः, तक्षे बहाः, असं बहाः, मासंगाः, जनबहाः, वनेमा चुक, इतुंबहाः (खीर भोजन), अतलखुबही, मूबहाः, मखं बही, मखं बहाः, लायकूबही, मरुबही, पीगः ननी, सिख्वंमू बहाः (कुमारि बहाः), चिकंमू, न्हूघः, मिखाबहाः, मुसुंबहाः, तःबहाः, लगंबहाः, न्हाय्कंबही, इकुबहाः शो बहाः, नःबही, ओमबहाः, न्हूसाः, तेबहाः, दुगंबही, सबल बहाः, महाबू बहाः जुयाः जमलय् थ्यंकाः क्वचाइ ।
संघपाखें तःदँ न्ह्यःनिसें थुकथं सकलें शाक्य वज्राचार्यपिं छथाय् हे मुनाः मंकाःकथं पंजरां फः वनेगु याना वयाच्वंगु दु । थुकथं पंजरांपाखें संकलन जूगु ध्यबा लुम्बिनीइ दयेकाच्वंगु वज्रयान महाविहारय् निंतिं ग्वाहालि याना वयाच्वंगु दु ।
LEAVE YOUR COMMENTS