साहित्य मन्दिरया झिंस्वक्वःगु तँमुँज्या
ख्वप(नेपालभाषा टाइम्स)- थनया दकलय् पुलांगु साहित्यिक संस्था नेपाल साहित्य मन्दिरया झिंस्वक्वःगु तःमुँज्या शनिवाः जुल । खौमाय् च्वंगु जागृति माविइ जूगु तःमुँज्याय् संस्थाया पुलांम्ह नायःलिसें संरक्षक साहित्यकार तिलकप्रकाश कायस्थयात न्याद्वः तका दांलिसें दोसल्ला न्ययेकाः हनापौ देछासे हनेज्या याःगु खः ।
साहित्य मन्दिरया नायः अगिब बनेपालीया सभापतित्वय् जूगु ज्याझ्वलय् प्रगतिशील वरिष्ठ कवि डा. योगेन्द्र प्रधान मूपाहांकथं झायादीगु खः । ज्याझ्वलय् नवासें मूपाहां कवि डा. प्रधानं २०१७ सालय् असहज परिस्थितिइ नं थःगु राजनीतिक अडान कायम यानाः भाषा व साहित्यय् लगे जुयादीम्ह साहित्यकार कायस्थ तत्कालीन राजनीतिक व सामाजिक जीवनया छम्ह अनुकरणीय व्यक्तित्व खः धयादिल ।
सम्मानित व्यक्तित्व कायस्थं नेपाल साहित्य मन्दिरया इतिहासयात कुलादिसें सामाजिक संघसंस्था धइगु हे मदुनिगु इलय् साहित्य मन्दिरं राजनीति लिसें सामाजिक क्षेत्रय् थीथी ज्याझ्वः यानाः योगदान बियादीगु खँ कनादिल ।
ज्याझ्वलय् हर्षलाल लुमन्ति कोषया संरक्षक कृष्णलाल ओझांथाछेँ प्रधानं न्हापा थःपिंसं कासा ख्यलय् व लिपा भाषा, साहित्य, संस्कृति व सम्पदाया ख्यलय् ग्वाहालि याना वयाच्वनागु जानकारी बियादिल ।
संस्थाया सचिव हरिशरण राजोपाध्यायं वार्षिक प्रगति विवरण व दांभरिं भावना जोशी कायस्थं आर्थिक विवरण न्ह्यब्वयादीगु खः । ज्याझ्लय् नेवाः जागरण मञ्चया नायः ओमचरण अमात्य, विराट नेपालभाषा साहित्य सम्मेनल गुथि (विराट गुथि)या पुलांम्ह नायः त्रिरत्न शाक्यं नं थःथःगु नुगःखँ तयादीगु खः ।
संस्थाया न्वकु विक्रमबहादुर कायस्थं लसकुस यानादीगु ज्याझ्वलय् गुह्येश्वरी शाक्यं भिंतुना म्येँ व माणिकबाब ग्वगंलं भिंतुना चिनाखँ न्यंकादगिु खः । संस्थाया संरक्षक तकं जुयादीम्ह सम्मानित व्यक्तित्व कायस्थं थः आवंलिं संस्थाया संरक्षकय् मच्वनेगु घोषणा यानादीगु खः ।
LEAVE YOUR COMMENTS