कर्मचारीयात ज्या हे तोके यानाः जिम्मा

येँ – सरकारं विकास व समृद्धिया लक्ष्य दयेकूसां कर्मचारीं ज्या मयाःगु कारणं अज्याःगु लक्ष्य पूवंके फयाच्वंगु मदुनि । उकिं आः निजामति कर्मचारीतय्त नं ज्या याकेगु लागिं आः सरकारं हरेक अधिकृतस्तरया कर्मचारीं थःत जिम्मा बिउगु निश्चित ज्या यानां तुं त्वःतेमाः धकाः सम्झौता हे यायेगु प्रक्रिया न्ह्यःने न्ह्याकूगु दु ।

आः फुक्क मन्त्रालयं अनया सचिवलिसे थ्व सम्झौता याइ, सचिवं महाशाखा प्रमुखलिसे सम्झौता याइ, महाशाखा प्रमुखं विभागीय प्रमुखतलिसे सम्झौता याइ । थुकियात सरकारं ‘कार्य सम्पादन सम्झौता’ धकाः नां बिउगु दु । थुकी तोके यानातःम्ह कर्मचारीं दछिया दुने थुलि ज्या सिधयेके हे माः धकाः ज्या हे तोके याना बी ।

हरेक प्यला प्यलाय् वं यानाच्वंगु ज्या लक्ष्यपाखे न्ह्यानाच्वंगु दु लाकि मदु धकाः समीक्षा यायेगु ज्या जुइ । छुं जुयाः वं यानाच्वंगु ज्या लक्ष्यपाखे न्ह्यानाच्वंगु मदु व थःत बियातःगु ज्या वं पूवंकीगु सम्भावना मंत धाःसा वयात तुरुन्त हे अनं मेथाय् सरुवा याना छ्वये फइगु खँ धाःगु दु ।

थ्व प्रणाली लागू याःसा कर्मचारीं ज्या याइ लाकि धकाः सरकारं थगुने गृह मन्त्रालय अन्तर्गतया थीथी निकायय् थुकियात प्रयोग याना स्वःगु खः । थुगु दँ निसें फुक्क हे मन्त्रालयय् थुकियात लागू यायेत्यंगु खः ।

सरकारं हरेक वर्षय् तयार याइगु बजेट व नीति तथा कार्यक्रमं थःगु लक्ष्य पूवंके मफयाच्वंगुया कारण कर्मचारीं इलय् ज्या मयाःगुलिं हे खः धइगु निष्कर्ष पिकासें सरकारं थ्व प्रणाली लागू यायेत्यंगु खँ धाःगु दु । तर गुलिखे पुलांपिं प्रशासकतय्सं धाःसा थ्व प्रणालीं नं ज्या याइ धकाः ग्यारेन्टी काये मफइगु व थ्व व्यवहारिक समेत मजुइगु खँ धयाहःगु दु ।