सिक्किमय् क्वाति पुन्हि

येँ – थुगुसी गुंपुन्हिया झ्वलय् भारतीय प्रान्त सिक्किमय् नं ‘क्वाति पुन्हि’ हनेगु ज्या जुल । सिक्किमया सिंताम धाःगु थासय् स्थानीय नेवाः भाय् ब्वनेकुथिया ग्वसालय् क्वाति पुन्हि न्ययेकाः क्वाति नयेगु ज्या जूगु खः । थुकी अनया करिब ८० म्ह नेवाः व गैरनेवाःतय्सं ब्वति काःगु खः ।

ज्याझ्वलय् सिंताम नगर पञ्चायतया प्रमुख शरण प्रधान मूपाहां कथंझाःगु खः । नेवाः भाय् ब्वनेकुथिया नायः विनोद प्रधानं नेवाः नखःचखःव क्वातिया महत्व बारे कनादिल । थ्वहे झ्वलय् वय्कलं आः वइगु नोभेम्बरय् सिक्किम नेवाः गुथिं थःगु रजत जयन्तीया लसताय् याइगु तःधंगु नेवाः महोत्सवय् थःपिंसं नं थज्याःगु हे नेवाः नसात्वँसाया ब्वज्यायानाः अन ब्वति काः वनेगु जानकारी नं बियादिल ।

ज्याझ्वलय् के.एन. प्रधान व नगर पञ्चायत प्रमुख शरण प्रधानं ब्वनेकुथिपाखें यानाच्वंगु ज्याझ्वःयात च्वछायादिल । ज्याझ्वलय् रेश्मा प्रधान व आदर्श प्रधानं नेवाः हुलाप्याखं नं न्ह्यब्वयादीगु खः ।