विमान कुचा कुचा यानाः यात्रुतय् उद्धार

येँ– त्रिभुवन विमानस्थलय् दुर्घटना जुयाः च्याःगु विमानयात कुचा कुचाः यानाः यात्रुतय् उद्धार याःगु दु । एक्जाभेटर हयाः विमानया पाता पाता लिकयाः यात्रुतय् उद्धार याःगु खः । सेनां नं खिपः तयाः विमानया पातापाता लिकाःगु खः ।
थौं न्हिनय् २ः२० बजे पाखे बंगलादेशया युएस बंगला विमान अवतरण यायेगु झ्वलय् दुर्घटना जूगु खः । प्रत्यक्षदर्शीतय्सं अवतरण जूगु इलय् विमान च्यनाः कुहां वःगु खँ धाःगु दु । विमानय् च्याःगु मि धाःसा स्यायेधुंकूगु दु ।
विमानय् चालक दल सहित ७१ म्ह मनू दुगु खँ विमानस्थलया प्रवक्ता प्रेमनाथ ठाकुरं धयादीगु दु । विमानय् ६७ म्ह यात्रु व प्यम्ह चालक दलया सदस्य दुगु खः । उद्धार याःपिं यात्रुतय्त धमाधम अस्पताल यंकाच्वंगु दु । अस्पतालय् हःपिं यात्रुत च्यानाच्वंगु खँ धाःगु दु । दुर्घटनास्थलय् हे सीपिं यात्रुतय्त नं विमानं पित हयाच्वंगु दु ।
आःतक ग्वःम्ह सित व ग्वःम्ह घाःपाः जुल धयागु सीमदुनि ।

नेपालभाषा टाइम्स

च्वमिया मेमेगु

• झीगु सःया निसःब्व थ्यन, निम्ह संचारकःमि सम्मानित
• बालेनया जय जयकार सुनियोजित धइगु पुष्टि
• यँयाःयात झःझः धायेकीम्ह पुलुकिसि
• कन्हय् महाकविया किपा बग्गीइ तयाः चाःहीकीगु
• राजदूतया खँय् नेकां–एमाले ल्वापु