१५ खर्ब ३२ अर्बया बजेट
येँ – सरकारं आर्थिक दँ २०७६÷७७ या बजेट सार्वजनिक याःगु दु । म्हिगः बुधवाः संघीय संसदय् अर्थमन्त्री युवराज खतिवडां १५ खर्ब ३२ अर्ब ८६ करोड ९१ लाख तकाया बजेट पेश यानादीगु खः ।सरकारं थ्वहे बजेट मार्फत सकलें सरकारी कर्मचारीया तलब नं २० प्रतिशत बढे याना बिउगु दुसा वृद्ध भत्ता नं लय् २००० तकां बढे यानाः आः ३००० तका याना बिउगु दु ।
वइगु आर्थिक दँया निंतिं चालुपाखे ९ खर्ब ५७ अर्ब १० करोड अथे धइगु ६२.४ प्रतिशत व पुँजीगतपाखे ४ खर्ब ५९ करोड अथे धइगु २६.६ प्रतिशत व वित्तीय व्यवस्थापनपाखे १ खर्ब ६७ अर्ब ८८ करोड अथे धइगु ११ प्रतिशत बजेट विनियोजन याःगु दु । स्रोत व्यवस्थापनपाखे ९ खर्ब ८१ अर्ब १३ करोड ८३ लाख राजश्व म्हयेगु आज्जु तयातःगु दु ।
अथेहे वैदेशिक अनुदानपाखे ५७ अर्ब ९९ करोड ५५ लाख म्हयेगु आज्जु तयातःगु दु । वइगु दँया निंतिं शिक्षाय् १ खर्ब ६३ अर्ब तका बजेट फ्यानागु खँ अर्थमन्त्री खतिवडां कनादीगु दु । अथे हे स्वास्थ्यय् ६८ अर्ब ७८ करोड तका विनियोजन याःगु दु । उकथं हे पुनर्निर्माणया निंतिं १ खर्ब ४१ अर्ब तका विनियोजन याःगु दुसा त्वनेगु लः व सरसफाइया निंतिं ४३ अर्ब ४६ करोड तका बिनियोजन याःगु दु ।
प्रधानमन्त्री रोजगार ज्याझ्वःया निंतिं ५ अर्ब १ करोड तका बजेट विनियोजन याःगु दुसा श्रम तथा रोजगार क्षेत्रय् ७ अर्ब १४ करोड तका विनियोजन याःगु दु । सामाजिक सुरक्षा ज्याझ्वःया निंतिं ६४ अर्ब ५० करोड तका विनियोजन याःगु दु । अथेहे कृषि व पशुपंक्षी क्षेत्रया निंतिं ३४ अर्ब ८० करोड तका, महिला बालबालिका तथा ज्येष्ठ नागरिकया क्षेत्रय् ७८ करोड तका बजेट विनियोजना याःगु दु ।
थुगु बजेटय् सरकारं राष्ट्रिय गौरवया आयोजनायात प्राथमिकताय् तःगु दु । सरकारं रेलमार्ग, फास्ट ट्राय्क, नागढुंगा–धादिङ सुरुङ मार्गयात प्राथमिकताय् तयाः बजेट विनियोजन याःगु दु । अथे हे बजेटय् राजनीतिक क्षेत्रं हे विवादित जुयाच्वंगु सांसद विकास कोषयात नं अप्वयेकाः ६ करोड थ्यंकूगु दु ।
न्हापा थ्व कोषया ध्यबा ४ करोड तका खः । सांसद विकास कोषया ध्यबा दुरुपयोग जुयाच्वंगु धासें पुलांपिं अर्थमन्त्रीया लिसें सांसदपिंसं हे विरोध याना वयाच्वंगु खः । गुलिखे सांसदतय्सं धाःसा थ्व ध्यबा नं १० करोड यायेमाः धकाः माग यानाच्वंगु दु ।
LEAVE YOUR COMMENTS