छक्वलं झिम्ह मचा बुइकल

एजेन्सी- दक्षिण अफ्रिकाया छम्ह मिसां छक्वलं झिम्ह मचा बुइकूगु दु । छक्वलं यक्व मचा बुइकूगु थ्व न्हूगु कीर्तिमान नं जूगु खँ धाःगु दु ।

गोसियामे थमारा सिथोले नांया उम्ह मिसां स्थानीय ई कथं सोमवाः चान्हय् न्हय्म्ह काय व स्वम्ह म्ह्याय् छक्वलं बुइकूगु खः । सिथोलेया भाःतया कथं न्हापा स्क्यान याःबलय् च्याम्ह जक मचा खनेदुगु खःसा तर सोमवाः मचा बुइकूबलय् धाःसा झिम्ह पिहां वःगु खः । झिम्ह मचा खंबलय् छक्क चाःम्ह सिथोलेया भाःत टेबोहो सोतेत्सीं स्थानीय मिडिया प्रिटोरीआ न्यूजयात धाःगु दु । ‘जि तसकं लय्ता, अले भावुक नं दु । जि आः खँ ल्हायेफुगु स्थितिइ मदु ।’

छक्वलं स्वम्हं अप्वः मचा बुइगु तसकं म्हो जक जुइ । सामान्यत छक्वलं यक्व मस्त गर्भय् च्वनीगु धयागु मचा मदयाच्वंपिनि उपचार यानाः कृतिम गर्भाधारण याकीबलय् जक जुइगु खः । तर सिथोलेया प्वाथय् धाःसा प्राकृतिक रुपं हे झिम्ह मचा च्वंवःगु खः । ३७ दँया सिथोलेया थ्वयां न्ह्यः नं निम्ह जुम्ल्याहा मस्त दु । उपिं आः खुदँ दयेधुंकूगु खः ।

प्वाथय् दुगु २९ वाः दुबलय् सोमवाः अपरेशन यानाः मचा बुइकूगु खः । आः मां व सकलें मस्तय् स्वास्थ्य अवस्था बांलाःगु खँ धाःगु दु ।

सिथोलेया नां आः छक्वलं दकलय् अप्वः मचा बुइकूम्ह मां कथं गिनिज वल्र्ड रेकर्डय् च्वनीगु जुइ । थ्वयां न्ह्यः सन् २००९ य् छक्वलं च्याम्ह मचा बुइकूम्ह अमेरिकी मिसाया नां दकलय् अप्वः मचा बुइकूम्ह कथं गिनिज बुकय् नां च्वनाच्वंगु खः । वंगु महिनाय् जक मालीया २५ दँया हालिमा सिसे नांया मिसां नं छक्वलं गुम्ह मचा बुइकूगु खः, तर वया मस्त सुं नं छुं न्हि स्वयां अप्वः म्वाये मफुत ।
प्रिटोरिआ न्यूज लिसे लछि न्ह्यव खँ ल्हासें सिथोलें सुरुइ थःगु गर्भावस्था तसकं कठीन जूगु खँ धाःगु दु । थःम्हं स्वस्थ मचा बुइमा धकाः न्हियान्हिथं प्रार्थना यानाच्वनागु व गज्याःपिं मस्त बुइ धकाः तःन्हु तक द्यने हे मफुगु खँ धाःगु खः ।

‘उपिं गुकथं गर्भय् न्ह्यनी, उपिं म्वाइला धयागु न्ह्यसः जक मनय् वयाच्वनी, तर चिकित्सकतय्सं मचाछेँ यक्व फैले जुयाच्वंगु सुनिश्चित यानाबिल’ वं न्यूजयात धाःगु दु ।

सम्बन्धित बुखँ

LEAVE YOUR COMMENTS