म्यानमारया सैनिक शासनविरुद्ध युद्धया घोषणा

एजेन्सी- म्यानमारया सैनिक शासनविरुद्ध सेनां अपदस्थ याःपिं सांसद्तय्सं गठन याःगु राष्ट्रिय सहमतिया सरकारं (छाया सरकार, एनयुजीं) युद्धया घोषणा याःगु दु । वंगु फेब्रुअरी १ तारिखय् सेनां कू यानाः म्यानमारय् सैनिक शासन लागु याःगु खः ।

मंगलवाः सेनां अपदस्थ याःपिं निर्वाचित सांसद्तय्सं गठन याःगु म्यानमारया राष्ट्रिय सहमतिया सरकारया कार्यकारी राष्ट्रपति दुवा लसी लालें फेसबुकय् भिडियो सन्देश तयाः ‘जनता रक्षात्मक युद्ध’या घोषणा याःगु दु । राष्ट्रिय सहमतिया सरकारया कार्यकारी राष्ट्रपति दुवा लसीं जनताया जीवन व सम्पत्तिया रक्षाया जिम्मा कयाच्वंगु राष्ट्रिय सहमतिया सरकारं म्यानमारया जुन्ता सैनिक शासनविरुद्ध ‘जनता रक्षात्मक युद्ध’ शुरु यानागु धाःगु दु । कार्यकारी राष्ट्रपति दुवा लसीं म्यानमारया नागरिकतय्सं आतंककारी सैनिक शासनया विरोधय् देय्न्यकं विद्रोह याइ धकाः नं धाःगु दु ।

फेब्रुअरी १ तारिखय् जनरल मिन आङ हलिङं आङ साङ सुकीया सरकारयात अपदस्थ यानाः सैनिक शासन लागु याःगु खः । सेनां कू यासांनिसें सैनिक शासनया विरोध जुयावयाच्वंगु दु । विरोध प्रदर्शनय् द्वःछिसिबें अप्वः मनूत सीधुंकूगु दु । द्वलंद्वः मनूत जेलय् लानाच्वंगु दु ।

थ्वया हे दथुइ म्यानमारया अतिराष्ट्रवादी व मुस्लिमविरोधी भिक्षु असिन विराथुयात सैनिक सरकारं त्वःतूगु दु । म्यानमारया निर्वाचित सरकारं भिक्षु विराथुयात ज्वनाः राजद्रोहया मुद्दा तयातःगु खः । बुद्धिस्ट बिन लादेनया नामं चर्चित भिक्षु विराथुं मुस्लिम व रोहिंग्या समुदायविरुद्ध न्वचु बिउगु खः । भिक्षु विराथुं सेनाया समर्थन व आङ साङ सुकीया विरोध यानाः न्वचु बिउगु खः । भिक्षु विराथुयात सेनाया समर्थन दु । सोमवाः सेनां भिक्षु विराथु विरुद्धया मुद्दा खारेज याःगु खः । भिक्षु विराथुं नोभेम्बरय् आत्मसमर्पण याःगु खः ।

सम्बन्धित बुखँ

LEAVE YOUR COMMENTS