नेपाल लिपि गुथिया ४२ दँ बुन्हि

येँ- नेपाल लिपि गुथिं थःगु ४१ क्वःगु बुन्हिं भर्चुअल माध्यमं हंगु दु । लिपि गुथि ४१ दँ फुनाः ४२ क्यंगु लसताय् ‘लिपि लसकुस’ नां बियाः भर्चुअल माध्यमं उगु ज्याझ्वः जूगु खः ।

ज्याझ्वलय् गुथिया नायः निरञ्जन ताम्राकारं लिपि गुथिया नीस्वंगु इलंनिसें थौंया अवस्था तकया बारे बःचाहाकलं जानकारी बियादीगु खः । वय्कलं लिपि गुथि गुकथं नीस्वनेगु ज्या जुल धइगु जानकारी बियादिसें लिपि गुथिं निरन्तर रुपं तःमुँज्या यानाः गुथिया न्हूधाः, जः न्हूधाः याना वयाच्वनागु जानकारी बियादीगु खः ।

अथे हे वय्कलं गुथिया थौंया अवस्थाय्तकं थ्यंगु इलय् लिपिं गुथिं पिथना वयाच्वंगु थीथी सफू, गुथिया आःया अवस्था, लिपांगु इलय् गुथिं याना वयाच्वंगु क्यालिजात्रा, लिपि नखः, लिपिं गुथिं आतक प्राप्त याःगु थीथी सिरपाः सम्मान, कोष आदिया बारे नं जानकारी बियादिसें वइगु दिनय् गुकथं न्ह्याकेगु धइगु बारे नं थःगु विचाः प्वंकादीगु खः ।

ज्याझ्वलय् भाषिक न्ह्यलुवा मल्ल के सुन्दर, नेवाः देय् दबूया नायः नरेश ताम्राकार, गुथिया पुलांम्ह न्वकु महेशमान डंगोल ‘लँजुवाः’, पुलांम्ह मिस नेवाः सुनिता डंगोलं नं भिंतुना न्वचु नापं वइगु दिनय् लिपि गुथिं यायेमाःगु ज्याया बारे सुझाव बियादीगु खः ।