अवार्ड उपविजेता वज्राचार्ययात भिंतुना देछा
यल – यल महानगरपालिका १६ वडापाखें नकतिनि क्वचाःगु संसार अनलाइन सि·िङ स्टार अवार्डया उपविजेता अमोघवीर वज्राचार्ययात भिंतुना देछाःगु दु । संसार क्रियसन व संसार अनलाइन टिभीया ग्वसालय् जूगु अवार्ड ज्याझ्वलय् फस्ट रनरअप जुइत ताःलाःम्ह वज्राचार्ययात वडापाखें छगू सम्मानलिसें भिंतुना देछाःगु खः ।
१६ वडाअध्यक्ष निर्मलरत्न शाक्यं वडा भवनय् जूगु ज्याझ्वलय् बूबहाः निवासी वज्राचार्ययात खादा क्वखायेकाः सम्मानपत्र लःल्हानादीगु खः । ज्याझ्वलय् नवासें वडाअध्यक्ष शाक्यं वडाया कलाकारतय्सं बिउगु उत्साहं समग्र वडायात हे उत्साहित यायेगु ज्या याइ धासें थुकथं हे उत्साह व लसता बीगु ज्याय् योगदान बिउपिं कलाकारयात वडापाखें औपचारिक रुपं सम्मान व भिंतुना देछायेगु ज्याया परम्परा न्ह्याकागु खः धयादिल ।
कलाकारं समाजया निंतिं योगदान बीगु व थः जन्म जूगु थाय्या गौरव नं अप्वयेकेगु ज्या याइ धासें वय्कलं १६ वडाया कलाकारतय्त ध्यानतय् तयाः हे कलाकार समिति नं गठन यानागु जानकारी वय्कलं बियादिल ।
कलाकार समितिया संयोजक सुरजवीर वज्राचार्यं फस्ट रनरअप वज्राचार्ययात भिंतुना बियादिसें कलाकारया सफलता वडाया हे सफलता खः धासें थुकथंया परम्परापाखें कलाकारतय्त लय्तायेकेगु ज्या जुइ धयादिल ।
सम्मानित कलाकार वज्राचार्यं वडा व समितिपाखें थुकथं ज्याझ्वः यानाः थःत भिंतुना देछायेगु व हनेज्या याःगुलिं लसता प्वंकुसे थुकिं यानाः थःत अझ अप्वः जिम्मेवारी बोध याकूगु दु धयादिल ।
वंगु शनिवाः थनया राष्ट्रिय सभागृहय् जूगु अवार्ड ज्याझ्वःया फिनालेय् इलामया अश्विन प्रधान न्हाप, यलया अमोघवीर वज्राचार्य लिउ व आश्रय रंजित लियांलिउ लाःगु खः ।
थीथी विधाय् जूगु अवार्ड ज्याझ्वलय् मल्टिमिडियापाखे सविना मानन्धर न्हाप, कल्पना श्रेष्ठ लिउ व राजेश महर्जन लियांलिउ लाःगु खः । १६ दँ क्वय्या उमेर समूहय् प्राप्ति तामाङं अवार्ड त्याकूगु खःसा फस्ट रनरअप रितु श्रेष्ठ व सेकेन्ड रनरअप झरना खनाल जुगु खः ।
LEAVE YOUR COMMENTS