वज्राचार्य संरक्षण गुथिया दँमुँज्या व न्हूधाः
येँ – वज्राचार्य संरक्षण गुथिया स्वीन्हय्क्वःगु दँमुँज्या वंगु शनिवाः जुल । थनया छुस्याबहालय् च्वंगु गुणाकर महाविहारय् दँमुँज्या जूगु खः ।
गुथिया नायः गम्भिर वज्राचार्यया सभापतित्वय् जूगु दँमुँज्याय् न्वकु सागरमान वज्राचार्यं लसकुस यानादीगु खःसा मूछ्याञ्जे मुनिन्द्ररत्न वज्राचार्यं वार्षिक प्रगति प्रतिवेदन व दांभरिं रमेशरत्न वज्राचार्यं आर्थिक प्रतिवेदनलिसें लेखा परीक्षणया प्रतिवेदन न्ह्यब्वयादीगु खः ।
मैत्रीपुर महाविहारया चक्रेश्वर धर्मदेव वज्राचार्यया विशेष उपस्थिति दुगु ज्याझ्वलय् गुथिया दुजःपिं प्रचण्डमान वज्राचार्य, आनन्दमुनि वज्राचार्य, राजेन्द्रमान वज्राचार्य लगायतं थःथःगु नुगःखँ तयादीगु खः ।
दँमुँज्याय् थुगुसी थ्व हे वइगु चिल्लाथ्व अस्तमि व नवमि निन्हुयंकं जुइगु देय् आचागूया स्वम्ह पाःलाःपिं नानीकाजी वज्राचार्य (क्वाःबहाः), चक्रेश्वर दि. उपेन्द्रवज्र वज्राचार्य–मखंबहाः) व बाबुकाजी वज्राचार्य (मणिसिंह महाविहार) मुसुंबहाःयात अनुदानकथं नीन्याद्वः तका दां नं लःल्हाःगु खः ।
थुकथं हे उगु दँमुँज्यां गुथिया न्हूगु ज्यासना पुचः नं ल्यःगु दु । न्हूगु ज्यासना पुचलय् गम्भिर वज्राचार्ययात हे वइगु कार्यकालया निंतिं नायः ल्यःगु दुसा सागरमान वज्राचार्य व रमेशरत्न वज्राचार्य न्वकु, मुनिन्द्ररत्न वज्राचार्य मूछ्याञ्जे, चुडामणि वज्राचार्य छ्याञ्जे, समिरविलास वज्राचार्य लिउछ्याञ्जे, त्रिरत्न वज्राचार्य दांभरिं व सजनरत्न वज्राचार्ययात लिउदांभरिंकथं ल्यःगु दु ।
अथे हे दुजलय् तीर्थदेवी वज्राचार्य, भवानी वज्राचार्य, अरुणकुमार वज्राचार्य, रविन्द्र वज्राचार्य व कमल वज्राचार्य च्वनादीगु दु ।
LEAVE YOUR COMMENTS