जगतसुन्दरय् तजिलजि ब्वज्या

येँ(नेपालभाषा टाइम्स)- जगतसुन्दर ब्वनेकुथिइ नेवाः तिसा वसः, नसाज्वलं, बाजं लगायत थीथी ज्वलंया ब्वज्या याःगु दु । तजिलजि ब्वज्याया नामं जूगु उगु ब्वज्याया उलेज्या ब्वनेकुथिया न्हापांम्ह प्रिन्सिपल रत्नदेवी कसां यानादीगु खः ।

थौंकन्हय् स्वनिगःया दक्व स्कुलय् नेपालभाषा अध्ययन याकेगु ज्या जुयाच्वंगु व स्कुलय् हे नं नेवाः संस्कार, संस्कृति, नसात्वँसा, तिसा वसःया बारे अध्ययन याकेगु व जानकारी बीगु ज्या जुयाच्वंगु सन्दर्भय् थुपिं सकतां छगू हे थासय् ब्वज्या यायेगु नापं जानकारी बीगु ल्याखं थुगु ब्वज्या यानागु ब्वनेकुथिया प्रिन्सिपल सुनिता मानन्धरं ‘नेपालभाषा टाइम्स’यात जानकारी बियादिल ।

वय्कलं बियादीगु जानकारीकथं थुगुसी न्हापांखुसी थुकथंया ब्वज्या यानागु खःसां आकिवं निसें दँय्दसं सकिमिला पुन्हिकुन्हु थुकथंया ब्वज्यायात निरन्तरता बीगु जुयाच्वंगु दु ।

ब्वज्या स्वयेत स्वनिगःया थीथी स्कुलं थः विद्यार्थीतय्त स्कुलया थःथःगु गाडीइ हे तयाः क्यने हःगु खः । सुथंनिसें म्वःम्वः विद्यार्थीत ब्वज्या स्वयेत वयाच्वंगु खःसा इमित ब्वज्याय् च्वनादीपिं स्कुलया हे विद्यार्थीतय्सं हलंज्वलंया बारे जानकारी नं बियाच्वंगु खः । स्वनिगःया स्वीगू ब्वनेकुथिया निद्वलं मल्याक विद्यार्थीत ब्वज्या अवलोकन यायेत वःगु ब्वनेकुथिं जानकारी बिउगु दु ।