पेट्रोलया भाः थहां वनेवं आन्दोलन

येँ -सरकारं म्हिगः पेट्रोलियम पदार्थया भाः थकायेवं उकिया विरुद्ध थाय्थासय् विद्यार्थीतय्सं प्रदर्शन याःगु दुसा गुलिखे थासय् प्रहरी व प्रदर्शनकारी दथुइ ल्वापु जुयाः छुं मनूत घाःपाः नं जूगु दु ।

भाः थकाःगु विरुद्ध एमाले समर्थित अनेरास्ववियु व युवा संघं धनगढीइ याःगु प्रदर्शनय् प्रहरीलिसे ल्वापु जूगु दु । धनगढीइ मुख्यमन्त्री ज्याकूया न्ह्यःने जूगु प्रदर्शनय् प्रधानमन्त्रीया पुत्ला च्याकेवं प्रहरी व प्रदर्शनकारी दथुइ ल्वापु जूगु खः ।

उकी लानाः निगुलिं पक्षया च्याम्ह घाःपाः जूगु दु । जिल्ला प्रहरी कार्यालय कैलालीया कथं उकी लानाः वडा प्रहरी कार्यालयया प्रमुख प्रहरी निरीक्षक गौरीप्रसाद जैशी सहित निम्ह हवल्दार व छम्ह जवान घाःपाः जूगु दु ।

अथे प्रदर्शनकारीत नं न्याम्ह घाःपाः जूगु दु । उकी अनेरास्ववियु कैलालीया संयोजक किशोर शाह, कुल रावल, हरीद्वारी राना, युवा संघ धनगढीया नगर संयोजक अभिषेक नाथ, रोहित बोगटी व अमर सिंह राना घाःपाः जूगु खः ।
अन प्रदर्शनकारीतय्सं मोटर– साइकल व स्कुटर घ्वानाः धनगढी बजाः चाःहिलाः सरकार विरुद्ध नारा थ्वयेकूगु खः ।

अथे हे येँय् विप्लव माओवादीया विद्यार्थी संगठनं नं म्हिगः टायर च्याकाः प्रदर्शन याःगु दु । उमिसं त्रिचन्द्र क्याम्पस न्ह्यःने टायर च्याकूगु खः ।

उकथं हे नेपाल यातायात स्वतन्त्र मजदुर संगठनं पेट्रोलियम पदार्थय् थकाःगु भाः क्वकायेत माग याःगु दु । संगठनया अध्यक्ष भिमज्वाला राई व महासचिव केशव थापां म्हिगः मंकाः विज्ञप्ति जारी यासें उगु माग याःगु खः ।

सरकारं वंगु मंगलवाः चान्हय् १२ बजेनिसें लागू जुइ कथं पेट्रोल, डिजेल व मचिकनय् प्रति लिटर स्वतका भाः थकाःगु खः । न्हूगु भाः कथं पेट्रोल लिटरं १४२, डिजेल व मचिकं १२५ तका थ्यंगु दु ।

सम्बन्धित बुखँ

LEAVE YOUR COMMENTS