दाहालयात ओलीया लिसः – ‘फुसा कारवाही या, अले जिं क्यनाबी’

येँ (नेपालभाषा टाइम्स) – प्रधानमन्त्री व नेपाल कम्युनिष्ट पार्टीया छम्ह अध्यक्ष केपी ओलीं मेम्ह अध्यक्ष पुष्पकमल दाहालयात फुसा थःत बहुमत क्यनाः कारवाही यायेत हाथ्या बियादीगु दु ।

अध्यक्ष दाहाल लिसें नेकपाया शीर्ष नेतात माधव नेपाल, झलनाथ खनालपिंसं ओलीयात प्रधानमन्त्री लिसें अध्यक्ष पदं चिइकेगु निंतिं पलाः ल्ह्वने वं ओली राजीनामा बीत तःधंगु दबाबय् लानाच्वंगु दु । अथेखःसां ओलीं म्हिगः दाहाललिसे जूगु ‘वान टु वान’ वार्ता थःत कारवाही यायेत हाथ्या ब्यूगु खः ।

म्हिगःया वार्ता दाहालं प्रधानमन्त्रीया समर्थत धकाः युवा संघया छुं नेतातय्सं सतकय् वयाः ओलीयात चिइके दइमखु धकाः प्रदर्शन यानाच्वंगु दिकेमाःगु खँ धाःगु खः । थुकिया लिसलय् ओलीं उमिसं प्रदर्शन दिकी मखु, थःम्हं नं राजीनामा बीमखु धकाः धयादीगु खँ ओली पक्षया नेतातय्सं धाःगु दु ।

‘व प्रधानमन्त्रीया समर्थनय् जूगु प्रदर्शन खः, छाय् दिकेगु ? फुसा बहुमतं कारवाही यानाः क्यँ, अले जिं छु यायेफु धयागु क्यनाबी’ धकाः ओलीं धाःगु खँ वय्कःया पक्षया छम्ह नेतां धाःगु दु ।

प्रधानमन्त्री ओलीं थःम्हं प्रधानमन्त्री नं अध्यक्ष नं त्वःतेमखु धकाः अडान कयादीगुलिं म्हिगःया वार्ता नं छुं निष्कर्षय् मवयेकं हे क्वचाःगु खः । म्हिगःया वार्ता लिपा निम्ह नेता दथुइ झन् जक विवाद तच्वइगु अवस्था वःगु खँ नं धाःगु दु । म्हिगः वार्ता क्वचाये धुंकाः हाकनं वार्ताय् च्वनेगु कि मच्वनेगु धयागु तकं खँ मजूगु धाःगु दु ।

म्हिगः प्रधानमन्त्रीं थःम्हं पद त्वःते मफइगु, मेगु विषयय् सहलह यानाः न्ह्याः वनेफइगु स्पष्ट रुपं धाःगु खः । दाहालं धाःसा जेठ २ गतेया सहमति कथं वनेफइगु खँ धाःगु खः । जेठ २ गते निम्ह अध्यक्षतय् दथुइ पालंपाः प्रधानमन्त्री जुइगु सहमति जूगु खः । ओलीं धाःसा मंसिर ४ गतेया सहमति कथं दाहालयात कार्यकारी अध्यक्षया भूमिका बल्लाका यंकेफइगु खँ धाःगु सीदुगु दु ।

निम्ह नेतातय् दथुइ तःन्हु न्ह्यव निसें सहमतिया निंतिं वान टु वात वार्ता जुया वयाच्वंगु दु । तर सहमति धाःसा आःतक जुइ फयाच्वंगु मदुनि । म्हिगः नं निम्हं नेतातय्सं अडान मत्वःतूगुलिं आः छु जुइ धयागु हे अन्यौल जुयाच्वंगु दु ।

गृहमन्त्री थापा ओली पक्षय्
छुं न्हि न्ह्यव दाहाल–नेपाल पक्षया भेलाय् थ्यंम्ह गृहमन्त्री रामबहादुर थापा ओलीं पक्षय् हे दुगु खँ धाःगु दु । ओली पक्षया छुं सांसदतय्सं म्हिगः गृहमन्त्री थापायात नापलाःगु खः । उबलय् थापां आःया अवस्थाय् प्रधानमन्त्री चिइके मजिउगु, थुकिं प्रतिक्रान्ति हइगु खँ धयादीगु खः । नेकपाया राष्ट्रिय सभाया सचे तक खिमलाल भट्टराई लिसें वंपिं नेकपाया केन्द्रीय दुजःत लिसे खँ ल्हासें थापां थ्व खँ धाःगु सीदुगु दु ।