महानगरया सार्वजनिक जग्गा अनुगमन शुरु

येँ – येँ महानगर लागाया सार्वजनिक जग्गाया अवस्था थुइकेत अनुगमन शुरु जूगु दु । येँ महानगरपालिका प्रमुख विद्यासुन्दर शाक्यं वडा दुनेया सार्वजनिक जग्गाया अवस्था छु गथे दु धइगु बारे थुइकेत अनुगमन यानादीगु खः । येँ मनपा प्रमुख शाक्य व उपप्रमुख हरिप्रभा खड्गी सहितया पुचलं सार्वजनिक जग्गाया अवस्था थुइकेगु ल्याखं उकथं अनुगमन यानादीगु खः । सार्वजनिक जग्गात व्यक्ति वा समूहपाखें कब्जा यायेगु यानाच्वंगु धासें अज्याःगु सार्वजनिक जग्गा समुदायया हितया निंतिं प्रयोगय् हयेगु ल्याखं उकथं अनुगमन न्ह्याकूगु खः । थ्व झ्वलय् महानगर प्रमुख व उपप्रमुखसहितया पुचलं येँ महानगरपालिका वडा नं. ११ स्थित हिजाखुसिया पश्चिमपाखे च्वंगु बसन्तनगरय् अनुगमन यानादीगु खः । अनुगमनया झ्वलय् येँ मनपाया उगु पुचलं उगु थासय् करिब च्यापी जग्गा सार्वजनिक जूगु निष्कर्ष पिकाःगु दु ।

उगु थासय् सार्वजनिक जग्गाया अवस्था अनुगमन लिपा अज्याःगु जग्गा संरक्षण यानाः मस्तय्त म्हितेगु थाय्, ज्याथजिथिपिंत झासू लनेगु थाय्, सुथय् बहनी सिचुगु फय् नयेगु थाय्या रुपय् विकास यायेगु मनपा प्रमुख शाक्यं धयादिल ।
लिसें वय्कलं सार्वजनिक जग्गा सकसिगुं साझा जुइमाः धासें न्ह्याथे यानाः जूसां नागरिकया उपभोग यायेगु थाय्या रुपय् विकास यायेगु जुइ धयादिल । अथे हे नगर उपप्रमुख खड्गीं आतक सार्वजनिक जग्गा संरक्षित यायेगु व नागरिकया प्रयोगया निंतिं रुपान्तरण यायेगु ज्या जूगु मदु । अवस्था थुइकाः सुधारया लँपु छु जुइ फइ धइगु मालेगु ज्या जुयाच्वंगु धासें आः धमाधम ज्या न्ह्याकेगु जुइ धयादिल ।वडा नं. ११ या वडाअध्यक्ष हिरालाल तण्डुकारं थःगु वडाय् च्वंगु सार्वजनिक जग्गा संरक्षण यायेगु ज्यालिसें अभियान शुरु जूगु धयादिल ।