अभिलेखालय चीकाः सर्वोच्चया पार्किङ
अभिलेखालय चीकूसा द्वलंद्वः अभिलेख नष्ट जुइफु
येँ – राष्ट्रिय अभिलेखालय भवनयात सर्वोच्च अदालतया पार्किङ लागा दयेकेगु लागिं अनं चीकेगु निर्णय जूसां मेगु थाय् बीगु खँ धाःसा अलपत्रय् लाः वनाच्वंगु दु । २०७१ बैशाख २५ गते मन्त्रिपरि–षद् बैठकं सर्वोच्च अदालतयात उगु थाय् बीगु व राष्ट्रिय अभिलेखालययात नारायणहिति राजदरवार लागा दुने तयेगु निर्णय याःगु खः ।
तर लिपा श्रावण २२ गते च्वंगु मन्त्रिपरिषद् बैठकं नेपाल सरकारया ट्रष्टया नामय् लानाच्वंगु नारायणहिति राजदरवार लागायात छगू सिटी प्लान दयेकाः अनया जग्गा स्यंके मबीगु कथं निर्णय यायेवं राष्ट्रिय अभिलेखालय अनं चीकाः गन तयेगु धइगु अन्यौल ब्वलंगु दु ।
सिंहदरवार लागा चछिन्हिछिं मत वयाच्वनीगु, सुरक्षाया ल्याखं नं बांलाःगु थाय् जूगुलिं तत्कालीन वीर पुस्तकालयं सारे यानाहःगु फुक्कं सामग्री २०२४ सालय् भारत सरकारं दयेका बिउगु उगु भवनय् तयातःगु खः । अझ अन जर्मन सरकारं दयेका बिउगु उच्चकोटीया माइक्रोफिल्म सुरक्षित याना तयेगु मेगु भवन नं दु ।
राष्ट्रिय अभिलेखायय् आपालं ऐतिहासिक महत्वया सामग्रीत दु । थज्याःगु अमूल्य निधि अनं चीकल धाःसा अभिलेखत नष्ट तकं जुइगु व लिपा गबलें उकियात पुनःस्थापना तकं याये मफया वनेफुगु ग्याचिकु ब्वलनाच्वंगु खँ अभिलेखालयया प्रमुख शौभाग्य प्रधानाङं नेपालभाषा टाइम्सयात कनादिल ।
जापानया टोयोटा फाउण्डेशनया ग्वाहालिं आशा सफूकुथिया थीथी थ्यासफू सुरक्षित यायेत माइक्रोफिल्म दयेकाः तःथें जर्मन सरकारया ग्वाहालिं अत्याधुनिक भवन दयेकाः सिंहदरवार परिसरय् हे लानाच्वंगु पुरातत्व विभाग अन्तर्गतया थ्व राष्ट्रिय अभिलेखालयं नं द्वलंद्वः अभिलेखत माइक्रोफिल्म दयेकाः सुरक्षित यानातःगु दु ।
उखेंथुखें सारे याये यात धाःसा न्हापा गथे खः अथे बचे यायेत थाकुइगु खँ अभिलेखालयया पुलांम्ह डा. प्रमुख साफल्य अमात्यं नं कनेगु यानादीगु दु । थ्व थासय् ‘पब्लिक रिलेशन’ नं अप्वइगु तर नारायणहिति राजदरवार वा मेगु गुगुं थासय् उलि अःपुक स्वापू तये मफइगु वय्कःपिनि धापू खः ।
नेपाःया इतिहास, नेपालभाषा, रञ्जना लिपि, तिब्बती, बंगाली नापं मेमेगु नं आपालं भासं च्वयातःगु थ्यासफू लगायतया नेपाः दुने हे सुरक्षित जुयाच्वंगु झिद्वलं मल्याक अभिलेखत थुगु अभिलेखालय् सुरक्षित जुयाच्वंगु दु ।
सिंहदरवार लिउने सर्वोच्च अदालतया ३०—४० रोपनी जग्गा आः नं खाली दयेक दयेकं राष्ट्रिय अभिलेखालयया १२ रोपनी जग्गाय्
हे पार्किङ तयेगु धकाः मन्त्रिपरिषदं याःगु उगु निर्णय उचित मजूगु खँ पुरातत्व व इतिहासलिसे आवद्ध थीथी विद्वान व अन्वेषकतय्सं नं धायेगु याना हःगु दु ।
LEAVE YOUR COMMENTS