च्वखँ कासाय् त्याःपिंत सिरपाः लःल्हात

येँ(नेपालभाषा टाइम्स)- युवा बौद्ध समूह येँ व लुम्बिनी नेप्लीज बुद्ध धर्म सोसाइटी युकेया मंकाः ग्वसालय् जूगु च्वखँ (निबन्ध) कासाय् उत्कृष्ट जूपिंत सिरपाः लःल्हाःगु दु । वंगु शनिवाः थनया भृकुटीमण्डपस्थित बुद्ध विहारय् जूगु छगू ज्याझ्वःया दथुइ सिरपाः लःल्हाःगु खः ।

कासाय् उत्कृष्ट जूपिंत विहारया प्रमुख भिक्षु कोण्डन्य महास्थविरं सिरपाः लःल्हाना बिज्याःगु खः । ‘मानसिक स्वास्थ्यया निंतिं बुद्ध शिक्षा’ विषयय् जूगु च्वखँ कासाय् पुष्परत्न तुलाधर न्हापा, दिना कंसाकार लिउ, जमुना गोसाइ लियांलिउ लाःगु खःसा सरोजकुमार वज्राचार्यं हःपाः सिरपाः त्याकादीगु खः । कासाय् न्हापयात च्याद्वः, लिउयात खुद्वः, लियांलियात प्यद्वः व हःपाःयात निद्वः तका सिरपाः लःल्हाःगु खः । कासाय् झिम्हेसिनं ब्वति काःगु खः ।

ज्याझ्वलय् नवासें बुद्ध भक्षु कोण्डन्य महास्थविरं निरोगी जुयाः च्वनेत भगवान बुद्धं इन्द्रीय संयम, भोजन मात्राया ज्ञान व जागरुकतायात बः बिया बिज्याःगु खँ कनाबिज्यात ।

समूहया सल्लाहकार डा. त्रिरत्न मानन्धरं न्हू पुस्तायात लेखन कलाया विकास जुइमा धइगु उद्देश्य तयाः बेलायतय् च्वनाच्वंपिं धर्मानुरागी पासापिनिगु ग्वाहालिं समूहं प्रत्येक निदँय् छक्वः जीवनोपयोगी विषय बियाः थुकथंया च्वखँ कासा याना वयाच्वनागु जानकारी बियादिल ।

सोसाइटीयानायः अमृतरत्न स्थापितं हरेक व्यक्तियाके मानसिक समस्या दयाच्वनी धासें थुकियात हे ध्यानय् तयाः थौंकन्हय् पश्चिमी देशय् नं विपश्यना ध्यानयात उपचारया छगू विधिया रुपय् मान्यता बिया हयाच्वंगु जानकारी बियादिल ।

च्वखँ कासाय् डा. त्रिरत्न मानन्धर, अमिता धाख्वा व प्रा. त्रिरत्न शाक्य निर्णायक मण्डलय् च्वनादीगु खः । समूहया नायः मदनबहादुर तुलाधरया सभापतित्वय् जूगु ज्याझ्वलय् पुरस्कृत प्यम्हेसिनं नं थःथःगु अनुभव न्यंकादीगु खः ।

सम्बन्धित बुखँ

LEAVE YOUR COMMENTS