‘नेवाः फण्ड जायेका वनेगु जुइ’
येँ – हलिं नेवाः दबूया नवनिर्वाचित नायः सिजन श्रेष्ठं क्वचाःगु तःमुँज्या न्ह्यः न्ह्यागु हे कथंया फाकुगु अवस्था सिर्जना जूगु खःसां आः फुकसित कःघानाः न्ह्याः वनाः न्ह्याः वनेगु खँ कनादीगु दु । ‘नेपालभाषा टाइम्स’ लिसे जूगु खँल्हाबल्हाय् वय्कलं थ्व खँ कनादीगु खः । वय्कलं धयादिल, ‘नेवाः मुद्दायात न्ह्यःने यंकेगु लागिं आः मनमुताव त्वःताः छप्पँ जुइगु बाहेक मेगु ला उपाय हे मदु ।’
आः थःगु कार्यकाल दत्या जक जुइगु जुयाः ज्या यायेत धाःसा थाकुइगु बिचाः नं वय्कलं प्वंकादिल । हलिं नेवाः दबू गठन जूगु च्यादँमछि दयेधुंकलं नं छुं ठोस ज्या याये मफयाच्वंगु इलय् दत्याया दुने यक्व ज्या यायेत थाकुइगु बिचाः वय्कलं प्वंकादिल । अथे खःसां आः थम्हं न्हापा स्वयां अप्वः ई बियाः छुं ठोस ज्या यानां तुं त्वःतेगु प्रतिवद्धता नं वय्कलं प्वंकादिल ।
हलिंन्यंकंया नेवाःतय्त ग्वाहालिया लागिं घोषणा जूगु वल्र्ड नेवाः फण्डय् थःगु कार्यकालय् म्होतिं नं २० लाख तका दां मुंका थनेगु ग्वसाः यानाच्वनागु खँ नं वय्कलं कनादिल । नेवाः न्ह्यलुवातय्सं धाःसा थ्व फण्डय् म्होतिं नं ५० लाख तका मुंकेमाःगु सुझाव बियाच्वंगु दु ।
थ्व दत्याया कार्यकाल धइगु छगू हे कार्यकालय् निम्ह नायः मखुसें बछि बछि कार्यकाल एकल नायः कथं हे नेतृत्व यायेगु खः धासें वय्कलं थः प्रतिस्पर्धी लिसें निवर्तमान वरिष्ठ न्वकु दया शाक्ययात वरिष्ठ न्वकु हे पदय् च्वनेत इनाप यायेगु खँ नं कनादीगु दु ।
श्रेष्ठ व शाक्यया दथुइ चुनाव यानाः नायः ल्यये मालीगु अवस्था वःगुलिं सहमति यानाः स्वदँया कार्यकाल दत्या दत्या नायः जुयाः चले यायेगु सहमति जूगु खः । सहमति कथं न्हापां नायः जुयादीम्ह श्रेष्ठयात आः दबूया कार्यसमितियात पूर्णता बीगु दायित्व निं न्ह्यःने वयाच्वंगु दु ।
LEAVE YOUR COMMENTS