ने. सं. ११४४ कौलाथ्व पारू - नःलास्वनेगु

खौमाय् जगतसुन्दर मल्लया बुन्हि हन

ख्वप (नेपालभाषा टाइम्स)- नेपालभाषाया प्यंगः थां मध्ये छगः मास्टर जगतसुन्दर मल्लया १४१ क्वःगु बुदिं खौमाय् च्वंगु जगतसुन्दर मल्लया झ्वाताय् स्वां देछासें हन । विराट नेपालभाषा साहित्य सम्मेलन गुथिं स्वां देछायेगु ज्याझ्वः व प्रवचन यासें बुदिं हंगु खः ।

ज्याझ्वःया मूपाहां बिराट नेपालभाषा साहित्य सम्मेलन गुथिया सल्लाहकार कवि डा. योगेन्द्र प्रधानं जगतसुन्दर मल्लयाके शिक्षा, भाषा व जातीय आन्दोलनया भावना ब्वलंगुया कारणत न्ह्यब्वयादिसें जगतसुन्दर मल्ल चन्द्र शमशेर थेंज्याःम्ह क्रुर शासकया इलय् तकं जापान, कलकत्ता व थीथी देश विदेशय् चाःहिला थःगु भाषाया गौरव थकायेत आर्थिक, सांस्कृतिक व राजनीतिक रुपं न्ह्यज्यानाच्वंम्ह ब्यक्तित्व खः धयादिल ।

बिराटया पुलांम्ह नायः नरेन्द्रभक्त हाडां प्रतिगामी, यथास्थितिवादी व अग्रगामी चालामालायात ध्वाथुइकाः भाषा छ्यलाबुला बारे राजनीतिक सुनिश्चितता कायम यायेमाःगु खँ कनादिल । अथेहे बिराटया मेम्ह पुलांम्ह नायः त्रिरत्न शाक्यं चीन थ्यंसां जापान थ्यंसां छम्ह विज्ञ कथं जगतसुन्दर मल्ल छम्ह विद्धान व्यक्तित्व कथं थःत प्रस्तुत यानाच्वंगु प्रसंग कुलादिल ।

बिराट नेपालभाषा साहित्य सम्मेलन गुथिया नायः महेन्द्रगोपाल कर्माचार्यया सभापतित्वय् जूगु ज्यावः पुलांम्ह नायः व छ्याञ्जे प्रदीपरत्न शाक्यं न्ह्याकादीगु खःसा ज्याझ्वलय् सहभागी सकसियांपाखें खौमाय् च्वंगु मास्टर जगतसुन्दर मल्लया झ्वाताय् स्वांमाः व स्वां देछायेगु ज्या नं जूगु खः ।