
यल- नःलि साहित्य दबूया ग्वसालय् द्वादश साहित्य अभियान अन्तर्गत वंगु शनिवाः ख्वनाय् नेपालभाषा साहित्य गोष्ठि ज्याझ्वः जुल । ख्वनाया जितापुर गन्धकुटी विहारय् जूगु ज्याझ्वलय् साहित्य गोष्ठि नापं थीथी व्यक्तित्वपिंत हनेज्या नं याःगु खः ।
यल महानगरपालिकाया प्रमुख चिरिबाबु महर्जन मूपाहां जुयादीगु ज्याझ्वलय् वय्कलं निक्वः ज्याजंक्व क्वचाये धुंकूम्ह स्थानीय समाजसेवी देवबहादुर डंगोल, कार्टुनिष्ट मोहनश्याम खोकना, नेपाल लिपि गुथिया न्वकु अनिल स्थापित, लिपि प्रशिक्षक राजेन्द्र शाक्यपिं हनापौ लःल्हानाः सम्मान यानादीगु खः ।
ज्याझ्वलय् नवासें मूपाहां महर्जनं आः न्यादँतक छुंकथंया विरोधय् जुलस, सभा आदि यायेगु त्वःताः मुक्कं विकास निर्माणया ज्याय् जक लगे जुइ फत धाःसा यल नगरया स्वरुप हे हिला यंके फइगु सम्भावना दु धयादिल । वय्कलं थः नं भाषा, साहित्य व कलाप्रति तसकं अनुग्रही जुयागु खँ न्ह्यथँसें ख्वनाया विकासया योजना ज्वनाः वल धाःसा उकिया निंतिं ज्या न्ह्याकेगु बचं बियादिल ।
लिधंसा पासा पुचः ख्वनाया सल्लाहकार व ज्याझ्वःया संयोजक कृष्णहरि डंगोलया सभापतित्वय् जूगु ज्याझ्वलय् सम्मानित व्यक्ति देवबहादुर व मोहनश्याम, ज्यापु महागुथिया नायः राजभाई जकःमि, २१ वडा ख्वनाया अध्यक्ष रविन्द्र महर्जन, नःलि साहित्य दबूया सल्लाहकार नरेशवीर शाक्यपिंसं नुगःखँ तयादीगु खः ।
ज्याझ्वलय् सौरभ शाक्य, समान्त, लुमन्ति चित्रकार, प्रेम के निडर, दशरथ शाक्य, रेणू शाक्य, दानदास श्रेष्ठ, नरेन्द्रमा किपू, कुम्हाः कृष्ण, दिब्या ताम्राकार, माणिक उराय्पिंसं थःथःगु च्वसु ब्वनाः न्यंकादीगु खः ।
LEAVE YOUR COMMENTS