क्यानाडाय् विश्व नेवाः दिवस व होलिपुन्हि

येँ- क्यानाडाया अल्बर्टा प्रान्तया एडमन्टन सहरय् च्वंपिं नेवाःतय् संस्था नेवाः कल्चरल सोसाइटी अफ एल्बर्टाया ग्वसालय् प्यक्वःगु विश्व नेवाः दिवसलिसें होलि नखः हनेगु ज्या जुल । विश्वन्यंकं महामारीया रुपय् न्यना वनाच्वंगु कोरोन भाइरस संक्रमणयात ध्यानय् तयाः भर्चुअल माध्यमं दिवस व होलि नखः हंगु खः ।

समाजया नायः डा. हेमन्त जोशीं त्वाःदेवाय् मत च्याकाः उलेज्या यानादीगु ज्याझ्वलय् वय्कलं हे लसकुस नं यानादीगु खः । नायः जोशीं होलि नखःया महत्वयात कयाः चर्चा यानादिसें भाइचारा व सद्भावया थ्व नखतं नेवाः समाजय् मेलमिलापया भावनायात अभिवृद्धि यायेत ग्वाहालि यानाच्वंगु दु धयादिल ।

अथे हे विश्वया मेमेगु देशय् थें क्यानाडाय् च्वंपिं नेवाःतय्सं नं दँय्दसं मार्च महिनाया लिपांगु दिंयात विश्व नेवाः दिवसकथं हनेगु याना वयाच्वंगु सन्दर्भयात कुलादिसें क्यानाडाया नेवाः समाजं नेवाःतय् भाषा, कला, संस्कृति, साहित्य, संगीत, नेवाः परम्परा ल्यंकेत कुतः याना वयाच्वंगु जानकारी बियादिल ।

थौंकन्हय् नेपालय् झायाच्वनादीम्ह समाजया उपाध्यक्ष त्रिप्रसाद धौभडेलं विश्व नेवाः दिवसया लसताय् बन्तपुलिइ जुयाच्वंगु ज्याझ्वःया बारे जानकारी बियादिसें भिंतुना बियादीगु खः ।
संस्थाया वरिष्ठ दुजः द्वारिका श्रेष्ठं होलि नखःया धार्मिक पक्षयात कयाः चर्चा यानादीगु ज्याझ्वः पूर्व उपाध्यक्ष प्रा. डा. केशव श्रेष्ठया संयोजनय् जूगु खः ।
उगु इलय् डा. सुरेश प्रधान व प्रेम श्रेष्ठं सारंगी व बासुरीया धुन न्ह्यब्वयादीगु खःसा डा. दिपेश श्रेष्ठं नेवाः म्येँया धुन व डा. केशव श्रेष्ठं मादल थानादीगु खः ।

सम्बन्धित बुखँ

LEAVE YOUR COMMENTS