जीवन्त संस्कृतिहरू पिदन

येँ – नेपाःया मूर्त व अमूर्त कला, संस्कृति व सम्पदा, जीवन्त संस्कृति, संस्कार, परम्परा, रीतिरिवाज व पुर्खां त्वःता थकूगु सांस्कृतिक धरोहरलिसें थीथी जात्राया किपा दुथ्याःगु ‘जीवन्त संस्कृतिहरू’ नांया सफू पिदंगु दु । फोटो पत्रकारद्वय शरण डंगोल व रेखा शाक्यं कयादीगु जात्रा, पर्व, नखःचखः, सम्पदाया किपा दुथ्याःगु उगु सफू राजभण्डारीतय् दुर्दाइ गुथिया वार्षिकोत्सवया लसताय् जूगु ज्याझ्वलय् पितब्वज्या याःगु खः ।

सफूया पिकाकः डा. हेरम्बबहादुर राजभण्डारी व स्नेहलता राजभण्डारीं मंकाःकथं उगु सफू पितब्वज्या यानादीगु खः । ज्याझ्वलय् नवासें सफूया पिकाकः हेरम्ब राजभण्डारीं झीगु भाषा, कला, संस्कृति धइगु हे झीगु म्हसीका खः धासें झी पुर्खायात म्हसीकेगु व इमिगु इतिहासया बारे सीकेगु माध्यम नं थ्व हे खः धयादिल ।

झी पुर्खां त्वःता थकूगु धरोहर, मूर्त अमूर्त सम्पदा, संस्कार, संस्कृति, परम्परा, रितिरिवाज, जात्रापात्रा, नखःचखः आदि थौं वयाः ईलिसे हिला वनाच्वंगु व गुलिखे लोप जुइगु अवस्थाय् थ्यनेधुंकूगु धासें इलय् झी सकलें सचेत जुयाः थुकिया संरक्षण यायेगु खँय् थौंया न्हूपुस्ता न्ह्यचिलेमाः धयादिल ।

वंगु छगू दशक न्ह्यवंनिसें स्वनिगःया संस्कृति, नखःचखः, जात्रा, पर्वलिसें धार्मिक, सांस्कृतिक व ऐतिहासिक महत्वया सम्पदा आदिया बारे अध्ययनलिसें स्थलगत रुपं भ्रमण यानाः पत्रकारद्वयं कयातःगु किपायात सफूया रुप बियाः पित हःगु खः । उगु सफुतिइ थीथी नीन्यागू जात्राया जानकारीलिसें थीथी इलय् जात्राया झ्वलय् कयातःगु रंगीन किपा दुथ्याकातःगु दु ।