येँयाः जात्राया अभिलेखिकरण
येँ (नेपालभाषा टाइम्स)/ येँया जात्राबलय् जुइगु थीथी जात्रा, बाजं, प्याखं आदिया अभिलेखिकरण यानातःगु सफू विमोचन जूगु दु । येँ महानगरपालिका २३ वडाया ग्वाहालि नेवाः नुगःपाखें येँयाःबलय् जुइगु जात्रा, बाजं, प्याखं लिसें थीथी सम्पदाया अभिलेखिकरण याःगु खः । थुगु अभिलेखिकरण दुथ्याःगु सफू शुक्रवाः छगू ज्याझ्वःया दथुइ मू पाहाँ येँ महानगरपालिकाया उपमेयर सुनिता डंगोल लिसें थीथी व्यक्तित्वपिंसं विमोचन याःगु खः ।
हनुमानध्वाखा दरवार संग्रहालयय् जूगु विमोचन समारोहय् न्ववासें मू पाहाँ डंगोलं थज्याःगु अभिलेखिकरण भावी पुस्तायात सम्पदा हस्तान्तरण यानावनेत महत्वपूर्ण जुइगु खँ धयादिसें थज्याःगु ज्याया सराहना यानादिल । थ्व झ्वलय् वय्कलं येँ महानगरपालिकापाखें सम्पदा संरक्षणया निंतिं यक्व ज्या याना वयाच्वंगु व थ्व ज्याया निंतिं नं येँयाःया अभिलेखिकरण दस्तावेज महत्वपूर्ण जुइगु खँ कनादिल ।
ज्याझ्वलय् न्ववानादिसें येँ महानगरपालिका २३ वडाया अध्यक्ष मचाराजा महर्जनं येँयाः थौंकन्हय् अन्तर्राष्ट्रियकरण जुया वयाच्वंगु खँ न्ह्यथँसें थुगु अभिलेखिकरण ज्यां येँयाःयात विश्व सम्पदा धलखय् दुथ्याकेगु निंतिं नं महत्वपूर्ण जुइगु खँ कनादिल । लिसें वय्कलं थ्व अभिलेखिकरण ज्यां तना वनाच्वंगु, न्हना वनाच्वंगु यक्व हे प्याखं, बाजं, मूर्ति लगायतया सम्पदा आः हाकनं संरक्षण यायेत ग्वाहालि जुइगु विश्वास नं प्वंकादिल ।
वय्कलं धयादिल, ‘येँयाःया परम्परां निसें चले जुया वयाच्वंगु, तर आः बन्द जूगु तःगू हे परम्पार, गतिविधि बारे जानकारी चूलाःगु दु, थुकिया अध्ययन अनुसन्धान यायेफइगु अवस्था वःगु दु, अले आः दिनाचवंगु परम्परायात हाकनं न्ह्याकेत तिबः बीफइगु अवस्था वःगु दु ।’ वय्कलं येँयाः जात्रा धालकि कुमारी खः सालीगु, लाखे प्याखं ल्हुकी, पुलुकिसि पिदनीगु जक धयाथें च्वनाच्वंगु, तर येँयाः दुने यक्व यक्व हे परम्परा, जात्रा दुगु, थुगु जात्रा परम्परात थीथी कारणं दिनाच्वंगु खँ धयादिसें थ्व अभिलेखिकरणय् अथे दिनाच्वंगु परम्परायात नं दुथ्याकागु खँ धयादिल ।
ज्याझ्वलय् नेवाः नुगःया अध्यक्ष सुरेश श्रेष्ठ व अभिलेखिकरणया निंतिं अध्ययन यानादीम्ह आभास धरानन्द राजोपाध्यायं नं अभिलेखिकरण ज्याय् वःगु चुनौति, थःपिंसं अभिलेखिकरण दुथ्याकागु दस्तावेज बारे न्ववानादीगु खः । ज्याझ्वलय् पुरातत्व विभागया महानिर्देशक सौभाग्य प्रधानाङ्ग, गुथि संस्थानया प्रशासक, राजगुरु मञ्जुवज्र वज्राचार्यपिं नं पाहां कथं झायादीगु खः ।
LEAVE YOUR COMMENTS