ने. सं. ११४३ चौलाथ्व पारू -

क्रोएशियाय् ६.४ स्केलया भुखाय्

एजेन्सी – मध्य क्रोएशियाय् ६.४ रेक्टर स्केलया भुखाय् ब्वःगु दु । भुखाय् लानाः म्हिगः सनिलय् तक न्हय्म्हेसिया ज्यान वंगु व तःम्ह घाःपाः जूगु खबर वःगु दु। मध्य क्रोएशियाया पेट्रेनिया धाःथासय् छम्ह झिंनिदँ दुम्ह मचाया ज्यान वंगु खँ क्रोएशियाया प्रधानमन्त्रीं भुखाय् ब्वःगु थाय्यानिरीक्षण लिपा धाःगु दुसा थुकिया लिक्कसं लाःगु ग्लीना सहरय् न्याम्हेसिया ज्यान वंगु खँ उपप्रधानमन्त्रीं धयादीगु दु । अथेहे मेम्ह छम्ह जाजीनामाय् च्वंगु छगू चर्चया भग्नावशेषय् लूगु खः ।

पेट्रेनियाया मेयरया कथं सहरय् थ्यंमथ्यं ब्वछि ब्व ध्वस्त जूगु दुसा ल्हानाच्वंपिं मनूतय्त धमाधम उद्धार ज्या जुयाच्वंगु दु । भुखाय्या धक्का क्रोएशियाया राजधानी जाग्रेव लिसें जःलाखःला देय् बोस्निया, सर्विया व इटलीइ थ्यंक महसुस जूगु खँ धाःगु दु ।

‘जिमिसं कारय् ल्हानाच्वंपिं मनूतय्त पिने पिकया च्वनागु दु’ पेट्रेनियाया मेयरं स्थानीय टिभीयात धयादीगु दु, ‘थन सामान्य त्रास खनेदु । मनूत थःथितिपिं मालेगु ज्याय् लगे जुयाच्वंगु दु ।’ नीद्वःम्ह जक च्वनीगु थ्व सहरय् मंगलवाः भुखाय् ब्वःबलय् मेयर संचारकःमितलिसे खँ ल्हानाच्वंगु खः । उबलय् भुखाय्या धक्का सामान्य जक खनेदुगु खः । तर क्षति धाःसा यक्व जूगु खँ धाःगु दु ।

‘छेँया टायलत फुक्क तज्याःगु दु, नये त्वनेगु दक्व वनाच्वंगु दु’ स्थानीय ७२ दँया स्थानीयं समाचार संस्था एएफपीलिसे खँ ल्हासें धाःगु दु, ‘जिपिं चाहे जुयाः नं छेँ दुने दुहां वनेगु अवस्था मदु । थन मत मदु ।’ जर्मन रिसर्च सेन्टर फर जीओसाइन्सेसया कथं स्थानीय ई कथं मंगलवाः न्हिनय् ११ः१९ बजे भुखाय् ब्वःगु खः ।