निगू करोड ६३ लाख मनूत कोरोना संक्रमणपाखें मुक्त

एजेन्सी – विश्वय् महामारी कथं न्यना वनाच्वंगु कोरोना भाइरस संक्रमिततय् ल्याः स्वंगू करोड ८० लाख थ्यंगु दु । जोन्स अकिन्स विश्वविद्यालयं बिउगु लिपांगु जानकारी कथं विश्वन्यंकं स्वंगू करोड ८० लाख ३३ हजार २८७ म्हेसित कोरोना संक्रमण जुइधुंकूगु दु । थुकी मध्ये निगू करोड ६३ लाख ८८ हजार ६३३ म्ह संक्रमण मुक्त जुइधुंकूगु दु ।

संक्रमण मुक्त जूपिं मध्ये दकलय् अप्वः भारतय् दु । भारतय् आःतक ६२ लाख २७ हजार २९५ म्ह संक्रमण मुक्त जूगु दु । मेखे अमेरिकाया अवस्था धाःसा ग्यानापुसे च्वनाच्वंगु दु । दकलय् मध्ये अप्वः संक्रमित दुगु देय् अमेरिकाय् आःतक ७८ लाख ५४ हजार ९१७ म्हेसित संक्रमण जुइधुंकूगु दुसा निगूलाख १५ हजार ८६१ म्ह संक्रमणया कारणं सीधुंकूगु दु ।

कोरोना संक्रमणं दकलय् प्रभावित जूगु देय्या धलखय् भारत व ब्राजिल छसिकथं निगूगु स्वंगूगु थासय् दु । भारतय् बुधवाः ७१ लाख ७५ हजार ८८० म्हेसित संक्रमण खनेदुगु दुसा १ लाख ९ हजार ८५६ म्ह कोरोनां यानाः सीधुंकूगु दु । अथेहे ब्राजिलय् आःतक ५१ लाख ३ हजार ४०८ म्हेसित संक्रमण जूगु दुसा १ लाख ५० हजार ६८७ म्हेसिया ज्यान वंगु दु ।