वाखुपतिइ चतुर्मास बाखं क्वचाल

ख्वप – ख्वप नगरपालिका वडा नं. ९ च्वंगु वाखुपति चाँगुनारायण द्यःथाय् प्यला न्ह्यवनिसें मदिकं न्ह्यानाच्वंगु श्री सत्यनारायण द्यःया चतुमार्स बाखं कनेगु ज्या शनिवाः विशेष रुपं धलं दनाः क्वचायेकल । बाखं धुंके धुंकाः बाखं कनाबिज्याःम्ह बःजुयात परम्परागत रुपं बाजं सहित बाखं पाः तये यंकाः सम्मान याःगु खः ।

स्थानीय आशाकाजी प्रजापतिं कृष्ण झुला लिसें थीथी धार्मिक पर्वया खर्च जुटे यानाः न्ह्याःगु उगु चतुर्मास बाखं कनेगु झ्वलय् करोडौं तकाया लुँ न्यानाः वाकुपति चाँगु नारायण द्यःया प्यंगुलिं पौयात लुं सिइगु अभियान न्ह्याकूगु खः । थ्व झ्वलय् अन थीथी भजन खलः व दाफा खलःपाखें म्ये व भजन न्यंकेगु नापं थीथी पर्वय् धलं दनेगु ज्या नं जूगु खः ।

ख्वप नगरपालिकाया मेयर सुनिल प्रजापतिं अन ग्वाहालि यानादीपिंत सम्मानपत्र लःल्हासें सम्मान यायेगु ज्या नं जूगु खः । वय्कलं धार्मिक सद्भावया कारणं हे नेपाः शान्त व सुन्दर देय् जुयाच्वंगु खँ स्पष्ट यानादिल । चतुर्मास बाखं कनेगु लिपांगु न्हि कुन्हु अन न्यय्प्यम्ह मिस्तय्सं धलं दनाः धार्मिक पर्व क्वचायेकूगु खः ।

वाकुपति चाँगुनारायण छाना निर्माण उपभोक्ता समितिं ग्वाहालि यानाः क्वचायेकूगु थुगु ज्याझ्वः धुंकाः भक्तजन व सहभागीपिंत जलपान याकूगु खः । झिंखुगूगु सदीइ चाँगुया प्रतिक कथं थ्व वाकुपति चाँगुनारायण द्यःया स्थापना जूगु अन उल्लेख जुयाच्वंगु दु ।