किपूया मेयरपाखें देगः उलेज्या

किपू (नेपालभाषा टाइम्स) – किपू नगरपालिकाया प्रमुख रमेश महर्जनं किपू नगरपालिका वडा नं. ६ स्थित पाण्डेछापय् नवनिर्मित गणेद्यःया देगःया उलेज्या यानादिल । वंगु शनिवाः जूगु छगू ज्याझ्वःया दथुइ नगरप्रमुख महर्जनं पूर्णविनायक गणेद्यःया देगःलिसें देगलय् च्वंगु थीथी मूर्तिया अनावरण यानादीगु खः ।

मूर्ति अनावरण यानादिसें नगरप्रमुख महर्जनं थौंया इलय् धार्मिक पर्यटक नं महत्वपूर्ण अंगया रुपय् विकास जुयाच्वंगु अवस्थाय् सार्वजनिक जग्गाय् थुकथं देगः दयेकेगु ज्या तसकं महत्वपूर्ण जू धयादिल । ह्रास जुया वनाच्वंगु सांस्कृतिक सम्पदायात पुनरुत्थान यायेगु ज्या जुयाच्वंगु इलय् सांस्कृतिक सम्पदाय् खर्च जक यायेगु मखसे थ्वपाखें आम्दानी जुइगु ज्या नं याये सयेकेमाःगु वय्कलं धयादिल ।

उगु इलय् वय्कलं मूर्ति अनावरण लिपा वृक्षारोपण नंयानादीगु खःसा ज्याझ्वय् किपू नगरपालिका वडा नं. ६ या वडाअध्यक्ष न्हुछेबहादुर महर्जनं सुभाय् देछायेगु झ्वलय् थःगु नुगः खँ प्वंकुसे बांलाःगु ज्या व बांलाःगु थासय् बजेट फ्यायेत नुगः स्याके मजिउ धयादिल ।

मन्दिर व्यवस्थापन समितिया अध्यक्ष नारायण थापामगरयासभापतित्वय् जूगुज्याझ्वलय् वडा सदस्यपिं सुनिल डंगोल, उत्तम नेपाल, व्यवस्थापन समिति सचिव अशोक थापा लगायतं नुगःखँ प्वंकादीगु खः ।