उकिं हे मौन खः ला ?

राजनीतिक विग्रहं ग्रस्त देशय् खः थें मखुथें छुं भचा जःया रेखा खने दुगु दु । भारतं कोभिड–१९या झिगू लाख खोप नेपाःयात अनुदान स्वरुव बिउगु दु । नेपालय् खोप बीगु नं शुरु यायेधुंकूगु दु । खतुं स्वंगू करोड जनसंख्या दुगु थासय् झिगू लाख खोपं गुलि समस्या तरे जुइ ?! कोभिड ल्वय्या उपचारया सिलसिलाय् ‘फ्रन्ट लाइन’य् च्वनाः ज्या यायेमाःपिंत निं खोप बिउगु दु । थथे हे मजिमगाःपिंत निं प्राथमिकता बियाः खोप बीबलय् अनुदानय् वःगु खोप गुलि ल्यनी ? फुइ धुंकी ।

आम जनता खोप काये दइ धइगु खँय् विश्वस्त जुइ मदुतले कोभिडया भय, त्रास, खतरां आम सर्वसाधारण मुक्त जुइ फइगु स्थिति मदु । पिने वयाच्वंगु बुखँकथं स्वास्थ्य मन्त्रीं कोरोनाया खोप न्यायेत सरकारयाके ध्यबा मदु धाःगु खँ पिहां वयाच्वंगु दु । मेखेर प्रधानमन्त्रीजुं आम जनतायात खोप निःशुल्क बी, धुक्क जुयादिसँ । हल्ला नं पिहां वयाच्वंगु दु । तर । प्रधानमन्त्री व स्वास्थ्यमन्त्रीया खँ गय् ल्वात ? छाय् अःखः जुल ? जनतां गथे यानाः सीकेगु ? जनता थौं अन्योलय् लानाच्वंगु दु । याकनं खोप वइ, आम जनतां काये दइ धइगु खँय् जनता विश्वस्त जुइ फयाच्वंगु मदु । आम जनतां खोप कायेत हाकनं थाय्थासं अनुदान वये मानीगु खः ला ? आः अनुदानया भरय् जनता म्वाये मालीगु खः ला ? स्वास्थ्यमन्त्रीं खोप न्यायेत ध्यबा मदु धाःगुया मतलब अनुदान वःसा जक खोप सर्वसाधारणयात बी फइ धाःगु स्वीकारोक्ति मखुला ?

जनता थौं अन्योलय् लानाच्वंगु दु । याकनं खोप वइ, आम जनतां काये दइ धइगु खँय् जनता विश्वस्त जुइ फयाच्वंगु मदु । आम जनतां खोप कायेत हाकनं थाय्थासं अनुदान वये मानीगु खः ला ? आः अनुदानया भरय् जनता म्वाये मालीगु खः ला ?

प्रधानमन्त्रीजु नं खोप निःशुल्क जुइ धाःगु अनुदानया आश यानाः खः ला ? जीवन मरणया खँय् जनतायात विदेशी अनुदानया भरय् तयाः पिनें राष्ट्रियता, राष्ट्रिय स्वाभिमान, गौरवया खँ ल्हाना जुइगु देय्या जिम्मेवार नेतातय् ल्वःला ? जीवन स्वयम खतराय् लानाः जनता छटपटय् जुयाच्वंगु इलय् नं जनतायात राहत बीत असक्षम सरकार जनताया सरकार गथे जुइ फइ ? गथे जुइ दइ ?

थौं देय्या राजनीति अमूर्त कला थें जुयाच्वंगु दु । छु खः जनतां थुइके फयाच्वंगु मदु । थुइकेत स्वयाच्वंपिंसं नं अनेक अर्थ छ्यानाच्वंगु दु । मनय् लू थे ! प्रधानमन्त्रीं चुनाव निश्चित तिथिइ जुइ । घोषणा यानाच्वंगु दु । मेखेर प्रधानमन्त्रीया विपक्षय् संसद भंग जूगु असंवैधानिक खः, थुकिया पुनःस्थापना जुइमाः । प्रतिवाद यानाच्वंगु दु । अन्तिम निर्णय बीगु निकाय सर्वोच्च अदालत खः । तर कलहया सम्बन्धित पक्षतय्सं थःथः पक्षय् निर्णय जुइमाः । खुल्लम खुल्ला वकालत यानाच्वंगु दु । मानौ अदालतं थःगु पक्षय् निर्णय मबिउसा देशय् हाकनं तःधंगु क्रान्ति जुइ । ‘ननभेज’ क्रान्ति । ख्याच्वः नं वयाच्वंगु दु । थज्याःगु राजनीतिक सन्कि, ख्याच्वःपाखें अदालत गुकथं प्रभावित जुइगु खः ? देशय् भयावह स्थिति सृजना जुइफु ।

थौं प्रधानमन्त्रीं संविधान उल्लंघन यात धइगु द्वपं दु । संविधानं मबिउगु अधिकर छ्यल धइगु द्वपं बिउगु दु । थ्व खँय् अधिकांश कानूनविद्, नागरिक समाजया मनूत प्रधानमन्त्रीया विरोधय् वःगु दु । खतुं संविधान धइगु राज्य संचालन यायेगु आधारभूत विधि खः । राज्यया संचालन संविधानकथं न्ह्यायेमाः । तर संविधान गुकथं सहज रुपं पालन जुइ धइगु खँ देय्या राजनेता व राजनीति नं भर परे जुइ । देशया राजनीति कच्चा, विसंगत, अराजककथं न्ह्याः वन धाःसा अन संविधान प्रभावकारी जुइ फइमखु । राजनीति व संविधान दथुइ अन्तर प्रभाव जुयाच्वनी । संविधानया जक खँ ल्हानां मजिउ । देय्या राजनीतिं राजनीतिया लागि न्ह्यागु नं याये फु, जिउ धइगु विचारं राजनीतिइ खेलवाड यायेत स्वल कि संविधान निरीह जुइ, न्ह्यवःसा जक जुइ । उगु अवस्थाय् संविधानया ब्याख्या उच्च अदालतं मखु, राजनीतिक दृष्टिं जुइमाः । थीथी दलतय् पूर्वाग्रह जुइ ।

देशय् संविधानसभां संविधान निर्माण जुल । जनतां दयेकूगु जनताया संविधान वल । तर संविधन निर्माणयात कयाः अद्यपि असन्तोष प्वंकीपिं दु । थ्व संविधान मात्र निम्ह, प्यम्ह नेतातय्सं दयेकूगु खः । थुकी आम जनताया प्रतिनिधित्व मदु । थ्व अपूर्ण । थ्वयात संशोधन यायेमाः । सः थ्वयेकीपिं नं दु । छगू टेलिभिजन अन्तर्वार्ताय् छम्ह बौद्धिक व्यक्ति सौरभं ला जिं संविधानयात माने मयाना धकाः तप्यंक हे धाल । संविधान निर्माणकालय् जनताया विश्वसनीयतायात छाय् चिउताः मतल ? थुकिं नं इलय् ब्यलय् संवैधानिक समस्यात वयाच्वने फु ।
छगू आश्चर्यया खँ ! थौं देशया राजनीतिक समस्यायात कयाः नागरिक समाज पिहां वल ।

पार्टीतय् द्वलंद्वः कार्यकर्तातय् भेला जुल । सर्ग हे थ्वक्क भाषणत यात । राजनीतिक दम्भया खेल क्यन । तर देशय् कोभिडया सन्त्रासं मर्नान्त अवस्थाय् लाःपिं आम जनताया निंतिं खोपया व्यवस्था याये माल धकाः छाय् सरकारयात राजनीतिक दबाव सुना नं मबिल ? राजनीति धइगु आम जनताया कल्याणया निंतिं ला कि केबल राजनीतिया लागि म्हितेगु खेल र विदेशी इशाराया अनुदानय् म्वानाच्वंपिं नेतातसें विदेशं खोप नं अनुदानय् वइ धकाः धुक्क जुयाच्वंगु खः ला ? उकिं हे मौन खःला ?

सम्बन्धित बुखँ

LEAVE YOUR COMMENTS