न्हू सरकार व जनताया चाहना

मुलुक आः न्हू नेपाः निर्माणया चाकलय् दुहां वंगु दु । संविधानकथंया निर्वाचन क्वचायाः प्रादेशिक सरकारया निर्माण व प्रतिनिधि सभाया निर्वाचनय् बहुमत हयेत ताःलाःगु नेकपा एमालेया अध्यक्ष केपी ओलीं न्हूम्ह प्रधानमन्त्रीकथं कार्यभार ग्रहण यायेधुंकूगु दु । खय्त ला थ्व सरकार ताः ई न्ह्यः हे गठन जुइमाःगु खः, तर कानूनय् दुगु कमीकमजोरीया बः कयाः नेपाली कांग्रेसया सभापति शेरबहादु देउवां कामचलाउ सरकार हे ताः ई तक न्ह्याकल । कामचलाउ सरकारं लिपा थ्यंक प्रभावित जुइगु छुं नं निर्णय यायेमदुगु अवस्थाय् नं अन्तिम इलय् आपालं अज्याःगु निर्णय यानावंगु दु ।

अज्याःगु निर्णयया प्रभावं आः सत्ता न्ह्याकीगु सरकारयात अःपुइगु मखसे झन हे कठिन यानाबीगु निक्र्यौल राजनीतिक पण्डिततय्गु दु । आःया वर्तमान राजनीतिक अवस्था न्हूगु व थुकिं याइगु ज्यायात उत्सुकतापूर्वक आम जनतां स्वयाच्वंगु दु । प्रतिनिधि सभा व प्रादेशिक सभाया निर्वाचनया इलय् निगू वामपन्थी पार्टी नेकपा एमाले व माओवादी केन्द्रं मंकाः कथं उम्मेदवारी बियाः मेगु प्रभावशाली राजनीतिक पार्टी नेपाली कांग्रेसयात ध्याकुनय् तयेयंकल । आःया न्यादँ नेपाली कांग्रेसयात प्रतिपक्षी राजनीति यायेत बाध्य यानाबिउगु दु ।

थ्वहे दथुइ एमाले व माओवादी केन्द्र आः न्हय्गू बुँदाया सहमति यानाः पार्टी एकिकरण यायेगु पक्का यायेधुंकूगु दु । थुपिं निगू पार्टी एकिकृत जुइ हे फइमखु धयागु सोचयात हाथ्या बियाः तसकं हे संवेदनशील स्थितिइ थुपिं एकीकरण जूगु दु । तर अझ नं थुपिं गुलि ई तक्क नापं च्वनेफइ धयागु खँय् धाःसा आशंका न्यना हे च्वंगु दनि । थुपिं निगू पार्टी एकिकरणय् पार्टीया अध्यक्षपिं जक उत्सुक जुयाच्वंगु चर्चा न्हापांनिसें जुयाच्वंगु खःसा पार्टी एकिकरणयात कयाः स्वयं निगू पार्टीया प्रभावशाली नेतात सन्तुष्ट जुयाच्वंगु मदु धयागु खँ नं पिहां वयाच्वंगु दु । पार्टीया क्वय्या निकायतक एकीकरणया पलाः गुकथं प्रभावशाली जुइ धयागु खँय् निगुलिं पार्टीया कार्यकर्तात निश्चिन्त जुइफुगु अवस्था मदुनि ।

नकतिनि क्वचाःगु प्रतिनिधि सभा व प्रादेशिक सभा निर्वाचनया उम्मेदवारतय्सं नेपाःमितय्त आपालं म्हगस इनाथकूगु दु । न्हू नेपाः निर्माणय् स्मार्ट सिटि निसें द्रुतगतिया रेल लगायतया मुलुक विकासया आश्वासन थुपिं राजनीतिक पार्टीतय्सं बियावःगु खः । प्रदेशया आर्थिक विकास, संघीयताया स्थायीत्वयात कयाः आपालं चर्चा परिचर्चा जुयाच्वंगु सन्र्दभय् आः मुलुकयात स्थायी सरकारया आवश्यकता व आर्थिक विकासया एजेण्डायात न्ह्यःने हयाः हे वाम गठबन्धनं बहुमतीय सरकार दयेकेत गाक्क मत कायेफुगु खः । आः न्हूगु सरकारयात थःपिंसं इनाथकागु म्हगस पूवंकेमाःगु हाथ्या दु ।

आः नं राजनीतिक खिचातानि यानाः मुलुकयात विकासया लँपुइ मयंकुसे राजनीतिक कचवं जक पिदनीगु ज्या जुयाच्वन धाःसा थुकिं वास्तवितक रुपं हे जनतादुने नैराश्य ब्वलनीगु निश्चित दु । वाम गठबन्धनया सरकार वयेवं थ्व सरकारं न्हापां याःगु छगू निर्णय हे विवादय् लायेधुंकूगु दु । नेपाली कांग्रेसया सरकारं राष्ट्रिय सभाय् मनोनयन सिफारिस याःपिं स्वम्ह सांसदतय्गु नां लितकयाः न्हूपिं राष्ट्रिय सभाया सांसद सिफारिस यायेगु व उमित नियुक्ति यायेगु ज्या जूगु दु । उकथं हे आःया सरकारं न्हापाया कामचलाउ सरकारं याःगु अनेक निर्णय उल्टे यायेफुगु खँ न्हापानिसें हे पिदनाच्वंगु दु ।

कामचलाउ सरकारं याःगु दुरगामि प्रभावया निर्णय निश्चय नं पुनर्मूल्याकनया विषय जुइफु । तर मात्र थ्व राजनीतिक दाउपेच जुइमजिउ । आःया सरकारया थुगु पलाः नं हाकनं पुलांगु नेपाल थें सत्ताकेन्द्रीत राजनीति जक मजुइमाः धयागु चाहना आम जनताया दु । आःया मेगुु हाथ्या धयागु मुलुकया परराष्ट्र नीतियात कयाः नं खः । देय्या परराष्ट्र निति आः सन्तुलित जुइमाः । नेपाःया संविधान पिदंगु इलय् भारतं थःपिंके मन्यँसे संविधान पितबिल धयागु त्वह तयाः खुलातक आर्थिक नाकाबन्दी तयेगु लिसें पारवहनय् समस्या यानाबिल ।

नेपाःया आर्थिक विकास व राजनीतिक अवस्थायात कयाः चीनपाखेर नं आपालं ग्वाहालिया सम्भावना दयाच्वंगु इलय् नेपालं निगू विशाल आर्थिक शक्ति भारत व चीनलिसे समानताया व्यवहार यानाः मुलुकयात आर्थिक गतिइ न्ह्याकेमाःगु अवस्था दु । थुकिया निंतिं भारतलिसे सत्तिक स्वापू दुगु मधेसी दलतय्त नं उचित व्यवहार यानाः मुलुकय् स्थायी शान्तिया निंतिं सरकार प्रतिवद्ध दु धयागु क्यनमाःगु दु । मुलुक विविध जातजाति व भाषाभाषीतय्गु देय् जूगु कारणं सम्पूर्ण जनताया अस्तित्वयात सम्मानपूर्वक विकासया मौका बिइमाः ।

मुलुक आर्थिकरुपं जक द्रुतगतिं न्ह्यावनेगु मखसे समस्त आदिवासी जनजातितय्त इमिगु पहिचान सहित देश विकासया मौका बीमाः । मुलुकयात विकासया लँपुइ न्ह्याकेगु मस्वसे सत्तारुद्ध व प्रतिपक्षी पार्टीतय्सं न्हापा थें हे थःपिनि पार्टी नेतातय्गु स्वार्थ, उमित बीगु सुविधाय् जक ध्यान बीगु ज्या जुल धाःसा थुकिं हाकनं मेगु विडम्वना ब्वलनीगु निश्चित दु । राजनीतिक पार्टीतय्सं हरेक ख्यलय् थःपिनिगु पार्टी नेता व कार्यकर्ताया उपस्थितिइ जक ध्यान बियाच्वन धाःसा न्हू नेपाः निर्माण म्हगस पूवनीगु स्थिति ब्वलनी मखु ।

आः मुलुक संघीयताय् प्रवेश जुइधुंकूगु कारणं हरेक प्रदेशया विकास निर्माण व आर्थिक सम्बृद्धिया खँय् केन्द्रया सरकारं ध्यान बीमाः । विकास व आर्थिक उन्नतिया संभावना प्रचुर मात्राय् दुगु मुलुकय् निहित स्वार्थय् तक्यनाः राजनीतिक व सत्ता केन्द्रीत राजनीति अले थःपिनि कार्यकर्ता व नेतातय्गु संरक्षणय् जक ध्यान वन धाःसा मेगु दुर्घटनाया सम्भावनायात नकारे यायेफइमखु । आःया जनताया आम चाहना धयागु मुलुकया विकास खः । थुकिया निंतिं म्हो खँ अले अप्वः ज्या जनताया इच्छा खः ।