ने. सं. ११४४ चौलाथ्व दशमी -

पार्टी आधिकारिकता दावी यायेगु लँपु बन्द जुइधुंकल – नेम्वाङ

येँ – सत्तारुढ नेपाल कम्युनिष्ट पार्टी कुचा जुयाः वःगु प्रचण्ड–माधव पक्षं निर्वाचन आयोगय् वनाः थःपिं हे आधिकारिक पार्टी जूगु दावी याःगु दु । अध्यक्षपिं पुष्पकमल दाहाल व माधव नेपाल थःपिं हे मंगलवाः निर्वाचन आयोगय् वनाः नेकपाया आधिकारिक चुनाव चिं सूर्य नं थःपिनिगु जुइगु दावी याःगु खः ।

तर प्रधानमन्त्री केपी ओली पक्षया नेता व पुलांम्ह सभामुख सुवास नेम्वाङं धाःसा पार्टी आधिकारिकता दावी यायेगु लँपु आयोगं बन्द यानाबीधुंकूगु धासें थ्व दावीया छुं औचित्य मदु धयादीगु दु ।

प्रचण्ड–नेपाल पक्षं नेकपाया बहुमत केन्द्रीय सदस्य हस्ताक्षर सहित राजनीतिक दल सम्बन्धी ऐनया दफा ४४या आधारय् आधिकारिता दावी याःगु खः । आधिकारिकता दावी यायेगु निंतिं प्रचण्ड–नेपाल पक्षं २७५ म्ह केन्द्रीय दुजःतय् सही मुंकायंकूगु खः ।

थ्व पक्षया नेता लीलामणि पोखरेलं थःपिंके पार्टीया विधान व राजनीतिक दल सम्बन्धी ऐन कथं गाक्क बहुमत दुगुलिं थःपिंत हे आधिकरिकता बीमाः धयादीगु दु ।

मेखे निर्वाचन आयोगं वंगु माघ १२ गते याःगु निर्णय कथं नेकपाया पुलांगु हे केन्द्रीय समितियात मान्यता बीधुंकूगुलिं आः आधिकारिकताया दावी यायेगु लँ हे बन्द जुइधुंकूगु खँ नेम्वाङं धयादीगु दु । तर पोखरेलं धाःसा थ्व हे निर्णयया आधारय् हे थःपिंत आधिकारिकता बीमाःगु खँ धयादीगु खः । वय्कलं धयादीगु दु, ‘आयोगं मान्यता बिउगु हे समितिया बहुमतया निर्णययात छाय् माने मयायेगु ?’

राजनीतिक दल सम्बन्धी ऐन कथं दलया आधिकारिकताय् विवाद वल धाःसा निर्वाचन आयोगं निर्णय यायेगु व्यवस्था यानातःगु दु । थ्व ऐनया दफा ४३ व ४४ य् निगू वा निगू स्वयां अप्वः दल वा छगू हे दलया निगू व निगू स्वयां अप्वः पक्षया दथुइ दलया नां, छाप, विधान, झण्डा व चिं, पदाधिकारी, केन्द्रीय समिति वा उकिया निर्णयया आधिकारिकता बारे विवाद जुल धाःसा आयोगं निर्णय यायेफइ धयातःगु दु ।

थ्वयां न्ह्यः प्रचण्ड–माधव पक्षं प्रधानमन्त्री केपी ओलीयात पार्टी निष्काशन यानाः माधव नेपालयात अध्यक्ष दयेकागु विवरण सहित आयोग दुगु केन्द्रीय समितिया धलःयात अध्यावधी यायेत इनाप याःगु खःसा केपी ओलीं पक्षं थप याःपिं केन्द्रीय समितिया नां दुथ्याकाः धलः अध्यावधी यायेत इनाप याःगु खः । तर आयोगं निगुलिं पक्षया इनापयात अस्वीकार यासें पार्टीया विधानकथं बैठक च्वनेगु निर्णय प्रक्रिया कथं पुलांगु हे समितियात मान्यता बीगु निर्णय याःगु खः । थ्व हे निर्णययात कयाः नेम्वाङ धयादीगु दु, ‘निर्वाचन आयोगं थ्वयां न्ह्यव हे आधिकारिकताया बारे निर्णय यायेधुंकल, आः थः यःयःबलय् आधिकारिकता दावी याः वनेगु धयागु ला जुइमखु नि ।’

आयोगया पदाधिकारीतय्सं छुं नं विवाद जुल धाःसा दफा ४३ व ४४ कथं वयेमाःगु खँ धया वयाच्वंगु खःसा नेता पाखेरेलं नं थःपिं आः थ्वहे दफा कथं आधिकारिकता दावी यायेत वनागु खँ धयादीगु दु । नेकपाया पुलांगु केन्द्रीय समितिया ल्याखं स्वयेगु खःसा आः प्रचण्ड–नेपाल पक्षया बहुमत दु ।