सिक्किमय् हन तःजिक यँयाः
येँ(नेपालभाषा टाइम्स)÷भारतया सिक्किम राज्यय् दँय्दसं थें थुगुसी नं यँयाः नखः तःजिक हंगु दु । सिक्किम नेवाः गुथिया ग्वसालय् कुमारिया खः सालाः यँयाः हंगु खः ।
यँयाःया इलय् येँय् न्यायेकीगु जात्राय् थें कुमारिया रथ सालाः जात्रा याःगु खः । थन येँय् जात्राया इलय् रथय् बिज्याकीम्ह कुमारिया माजुया हे किपा तयाः द्यः खः सालाः जात्रा यायेगु याना वयाच्वंगु दुुसा येँय् जात्रा याइगु दिंकुन्हु हे थन नं यँयाः जात्रा याइ । सिक्किमय् येँय् जात्रा याइम्ह कुमारिया हे किपा रथय् बिज्याकाः रथ सालाः जात्रा यायेगु याना वयाच्वंगु दु ।
थन येँय् थें जीवित व्यक्तियात कुमारिया रथय् मतसे येँय् जात्रा याइम्ह कुमारि माजुया हे किपा रथय् तयाः जात्रा यायेगु याना वयाच्वंगु खः । लिसें जात्राया इलय् लाखे, अष्टमातृका प्याखं नं पिथंगु खः ।
सिक्किमया आपालं नेवाःतय् सहभागिता दुगु जात्राय् धिमे बाजं व थीथी प्याखं नं पिथंगु खःसा सिक्किमया थीथी लागा परिक्रमा याःगु खः । येँय् च्यान्हुयंकं नखः हनीगु खःसा सिक्किमय् धाःसा छन्हु जक यँयाः हनेगु याना वयाच्वंगु दु । अथेखःसां यँयाःया छुं छुं ज्याझ्वः मेगु निन्हुतक नं हनेगु याना वयाच्वंगु दु ।
सिक्किमय् यँयाःया आपालं गतिविधि येँय् हनीगु नखःथें जूसां थन यःसिं थनेगु, व क्वःथयेगु उपाकू वनेगु, वंघः आजुद्यःयात थें छाय्पीगु, दशअवतार क्यनेगु थेंज्याःगु ज्याझ्वः धाःसा जुइमखु ।
सिक्किमय् स्वीन्याद्वलं मल्याक नेवाःत च्वना वयाच्वंगु सिक्किम निर्वाचन आयोगया तथ्यांक दु । उकीमध्ये यँयाः जात्राय् च्याद्वः निसें झिद्वःया ल्याखय् नेवाःतय्सं सक्रिय रुपं ब्वति कायेगु याना वयाच्वंगु दु ।
सन् २००० निसें सिक्किमय् यँयाः हनेगु शुरु याःगु खःसा सन् २०११ निसें सिक्किम राज्य सरकारं यँयाःया लसताय् सार्वजनिक रुपं विदा बिया वयाच्वंगु दु ।
LEAVE YOUR COMMENTS