समाजसेवाया निंतिं गेट्सं माइक्राेसफ्टया बाेर्ड नं त्वःतल
एजेन्सी- माइक्रोसफ्टया सहसंस्थापक बिल गेट्सं परोपकारी ज्याय् यक्व ई बीगु निंतिं माइक्रोसफ्टया संचालक समितिपाखें पिहां वयेगु घोषणा याःगु दु । वय्कलं विश्वब्यापी स्वास्थ्य, विकासया लिसें शिक्षा व जलवायु परिवर्तन नियन्त्रण यायेगु विषयय् थःगु ध्यान केन्द्रीत यायेगु इच्छा दुगु खँ धयादीगु दु ।
संसारया हे निम्हम्ह दकलय् धनीम्ह गेट्स थौंकन्हय् ६५ दँय् थ्यनाच्वंगु दु । वय्कः मेम्ह धनाढ्य ब्यापारी व परोपकारी वारन बफेटया तःधंगु होल्डिङ कम्पनी बाक्सर हाथवेया संचालक समितिपाखें नं पिहां वःगु दु । गेट्स सन् २००८ निसें हे माइक्रोसफ्टय् न्हियान्हिथं ज्या यायेमाःगु भूमिका पाखें रिटायर्ड कायेधुंकूम्ह खः ।
आः माइक्रोसफ्टया संचालक समितिपाखें नं पिहां वयेगु घोषणा यायेगु झ्वलय् गेट्सं थ्व कम्पनी थःगु जीवनया छगू महत्वपूर्ण अंग जूगु धासें थःम्हं कम्पनीया नेतृत्व तहलिसे निरन्तर सहकार्य यानाच्वनेगु खँ धयादीगु दु । फोब्र्स म्याग्जिनया कथं गेट्स थौंकन्हय् संसारया हे निम्हम्ह दकलय् धनीम्ह व्यक्ति खः । वयाके थौंकन्हय् १०३.६ अर्ब डलर सम्पत्ति दु । अमेजनया जेफ बेजास थौंकन्हय् दकलय् धनीम्ह व्यक्ति जुयाच्वंगु दु ।
गेट्स कम्प्यूटर सामान मिइगु लिसें सफ्टेवेयर विकास यानाः धनी जूम्ह खः । गेट्सं थः मचांनिसेंया पासा पोल एलनलिसे जानाः माइक्रोसफ्टया स्थापना याःगु खः । एलनया धाःसा सन् २०१८ य् मृत्यु जुइधुंकूगु दु । सन् १९८० इ आइबीएम कम्पनीलिसे अपरेटिङ सिस्टम प्रणाली विकास यायेगु सहमति यायेधुंकाः उमिसं तःधंगु उपलब्धी चूलाकूगु खः ।
गेट्स थौंकन्हय् थः व कलाःया नामं चायेकातःगु बिल एण्ड मिलिन्डा गेट्स फाउन्डेसन पाखें परोपकारी ज्याय् संलग्न जुयाच्वंगु दु । थ्व संस्थायात ४.८ डलर दान बीधुंकाः गेट्स तिपूयात सन् २०१८ य् अमेरिकाय् दकलय् दानवीर परोपकारी व्यक्ति घोषणा याःगु खः ।
LEAVE YOUR COMMENTS