अफगानिस्तानया निगूगु तःधंगु सहर कान्दाहार तालिबानया कब्जाय्

एजेन्सी- अफगानिस्तानया निगूगु तःधंगु सहर कान्दाहारय् तालिबानं कब्जा याःगु दु । अन्तर्राष्ट्रिय समाचार संस्था रोयर्टसयात कान्दाहारया स्थानीय सरकारी अधिकारीं थ्व जानकारी बिउगु खः । स्थानीय सरकारी अधिकारीं बिउगु जानकारीकथं बिहिवाः बहनी जूगु युद्ध लिपा तालिबानतय्सं कान्दाहार कब्जाय् काःगु खः ।

व्यापारिक व रणनीतिक हिसाबं कान्दाहार महत्वपूर्ण सहर खः । कान्दाहारय् अफगानिस्तानया अन्तर्राष्ट्रिय विमानस्थल नं दु । छगू इलय् कान्दाहार तालिबानतय्गु गढ जुयाच्वंगु सहर खः। तालिबानतय्सं थीथी प्रान्तीय राजधानी कब्जाय् कायेवं अफगान सरकारं सेनाया प्रमुख वली मोहम्मद अहमदजाइयात बुधवाः बर्खास्त यानाः न्हूम्ह सेना प्रमुखय् हिबतुल्लाह अलिजाइयात नियुक्त याःगु खः।

आफगानिस्तानय् दुगु ३४ गू प्रान्तीय राज्य मध्ये ११ गू राज्ययात तालिबानतय्सं कब्जाय् कायेधुंकूगु दु । बिहिवाः तालिबानतय्सं हेरात व घान्जीयात कब्जाय् काःगु खः । तालिबानतय्सं छवाःया दुने हे ११ गू प्रान्तीय राजधानीयात कब्जाय् कायेधुंकूगु दु ।

तालिबानतय्सं आः अफगानिस्तानया राजधानी काबुलयात कब्जा कायेत स्वयाच्वंगु दु । अमेरिकाया गुप्तचर अधिकारीतय्सं ९० न्हिया दुने तालिबानतय्सं काबुल कब्जाय् कायेफइगु नं धाःगु दु । थ्वया हे दथुइ अमेरिकां अफगानिस्तानय् दुगु थःपिनिगु दुतावासया कर्मचारीतय्त लित हयेत स्वद्वः अमेरिकी सेना अफगानिस्तानय् छ्वःगु दु ।
बिहिवाः अफगान सरकारया वार्ता टोलीं तालिबानतय्त सत्ता साझेदारया प्रस्ताव नं तःगु खः । सरकारी अधिकारीतय्सं कतारया मध्यस्थताय् हिंसा पनाः व शान्ति स्थापना यानाः तालिबानतय्त सत्ता सहकार्यया आह्वान याःगु खः ।

सम्बन्धित बुखँ

LEAVE YOUR COMMENTS