प्रतिगमनया लँपुइ प्रतिपक्षी !

नेपाःया राजनीति आः गुगु लँपुइ न्ह्याः वनी धइगु प्रतिक्षाया विषय जुयाच्वंगु दु। छखे दक्व धयाथें विपक्षी पार्टीत संसद पुनस्र्थापना जुइमाः धकाः आन्दोलनया लँपुइ न्ह्यानाच्वंगु दु। मेखे नेपाली कांग्रेस व राप्रपां चुनावय् वनेमाः धयाच्वंगु दु। अथे ला कांग्रेसया छगू पुचलं निर्वाचन मखु आःया आवश्यकता आन्दोलन खः धकाः धायेगु यानाच्वंगु अवस्था खः । थ्व ल्याखं वर्तमान राजनीतिक अवस्थायात कांग्रेसं स्पष्ट रुपं गुकथं कयाच्वन धइगु खँ स्पष्ट जुइ फयाच्वंगु मदु। कांग्रेसय् खने दयाच्वंगु निगू गुटया धारया कारणं जनता अलमलय् लानाच्वंगु दु। खतुं जुजु ज्ञानेन्दं राजनीतिक ‘कू’ याःगु इलय् आःया कांग्रेस सभापति शेरबहादुर देउवा थःत प्रधानमन्त्री दयेकेमाः धकाः बिन्तिपत्र बिउवंम्ह खः । तर उकिं ख्यें मथ्वयेवं आन्दोलनय् कुहां वयेमाःगु अवस्था वःगु खः । आः निर्वाचन जुल धाःसा थःत बहुमत वइगु व थः प्रधानमन्त्री जुइगु म्हगस खंकाः देउवां आन्दोलन मखु चुनावय् वने माः धयाच्वंगु दु ।

प्रधानमन्त्री केपी शर्मा ओलीं पुस ५ गते ल्ह्वंगु पलाः भिंकेमाःगु माग जुयाच्वंगु इलय् निर्वाचनया बासुरि पुइगु गुलितक पाय्छि धइगु न्ह्यसः थन ब्वलनाच्वंगु दु। सरकारं घोषणा याःगु निर्वाचनं जक राजनीतिक निकास बीमखु धइगु स्पष्ट जुइधुंकाः प्रधानमन्त्रीं छिउगु पलाः मभिंकुसे निर्वाचन यायेगु धइगु प्रतिगमनयात संस्थागत यायेगु बाहेक मेता जुइ मखु। अथे जुयाः सभापति देउवां धयाच्वंगु निर्वाचन केवल प्रतिगमनयात संस्थागत यायेगु ज्या जक जुइ । गुकिं यानाः संघीय लोकतान्त्रिक गणतन्त्र गुगु नं इलय् दुर्घटनाय् लायेफइगु खतरा दु। तर दुःखपूर्वक धायेमाः कि गुगु लँपुं सभापति देउवा न्ह्यानाच्वंगु दु व लँपु प्रतिगमनयात संस्थागत यायेगु बाहेकं मेता छुं याइगु आशा यायेथाय् मदु ।

नेतातय्सं इलय् हे छुं कथंया निर्णय मयात धाःसा उकिया लिच्वः गथे जुइ धइगु खँ वर्तमान राजनीतिक अवस्थां क्यनाच्वंगु दु। नेकपा दुने ब्वलंगु विवाद इलय् ज्यंके मफुगुया लिच्वः खः, प्रधानमन्त्री केपी शर्मा ओलीं ल्ह्वंगु पलाः । पार्टी प्रधान कि व्यक्ति प्रधानया ल्वापुइ व्यक्ति प्रधान जुइवं नेपाःया राजनीति थौंया अवस्थाय् थ्यंगु खः । खय्तला लोकतान्त्रिक अभ्यासय् पार्टी प्रधान जुइ । तर झीगु देशय् पार्टी प्रधान स्वयां नं व्यक्ति हावी जुइगु प्रवृत्तिया कारणं यानाः हे थौं लोकतन्त्र धरापय् लाःगु खः । अथे जुयाः थौं प्रधानमन्त्री गुगुं पलाः ल्ह्वंगु दु, उकियात भिंकेगु ज्या मजुल धाःसा लिपा लिपा नं देशय् अस्थिरता ब्वलनिगु निश्चित दु। बहुमत व अल्पमतया कारणं गथे न्हापा संसद भंग यायेगु ज्या जूगु खः । आः हाकनं अज्याःगु कासाया शुरुवात प्रधानमन्त्री केपी शर्मा ओलीपाखें जूगु दु। थ्व देय्या निंतिं तःधंगु हे विडम्बना खः । उगु गल्तीयात भिंकेत न्ह्यःने न्ह्यायेमाःगु कांग्रेसं तकं गल्तीयात संस्थागत यायेगुपाखे वनेगु गुलि तक उचित खः धइगु न्ह्यसः ब्वलंगु दु ।

कांग्रेस निर्वाचनया तयारी मखु कि आःया आवश्यकताकथं प्रतिनिधिसभा पुनर्स्थापना यायेगु लागि आन्दोलनय् कुहां वयेमाःगु अवस्था खः । तर सत्ताया भागबन्डाय् तक्यनाः विशेष यानाः शेरबहादुर देउवा आन्दोलनय् कुहां वयेगु मनस्थितिइ मदुगु खँ स्पष्ट जुयाच्वंगु दु ।

थौं नेपाःया राजनीति धरापय् लानाच्वंगु अवस्था खः । थः अल्पमतय् लायेवं प्रधानमन्त्रीं संसद भंग याःगु जक मखु निर्वाचनया तकं घोषणा यायेधुंकूगु दु। तर उगु निर्वाचन जुइ वा मजुइ धइगु खँय् आपाःसिनं मजुइगु धया वयाच्वंगु जक मखु वर्तमान प्रधानमन्त्रीं निर्वाचन हे याकी मखु धकाः नं दावी याना वयाच्वंगु अवस्था खः । उकिं थौंया आवश्यकता धइगु निर्वाचन मखु धइगु स्पष्ट जुयाच्वंगु अवस्थाय् कांग्रेस निर्वाचनया तयारी मखु कि आःया आवश्यकताकथं प्रतिनिधिसभा पुनर्स्थापन यायेगु लागि आन्दोलनय् कुहां वयेमाःगु अवस्था खः । तर सत्ताया भागबन्डाय्त क्यनाः विशेष यानाः शेरबहादुर देउवा आन्दोलनय् कुहां वयेगु मनस्थितिइ मदुगु खँ स्पष्ट जुयाच्वंगु दु । शेरबहादुर देउवां सत्ताया छुं ब्व थःपिनिगु लागि माः धकाः बार्गेनिब यानाच्वंगु धइगु आपाः पुलांगु खँ मखु। प्रतिनिधिसभा भंग याये न्ह्यः हे उकिया लागि प्रम ओली व देउवाया दथुइ सहलह ब्याःगु खँ सार्वजनिक जूगु खः । आः वयाः थःत वइगु उगु भाग त्वःतेमाली धकाः देउवां आन्दोलनयात स्वयां नं चुनावयात बः बियाच्वंगु खः धइगु खँ अझ यचुसें च्वनेधुंकूगु दु। गुगु कि देय्या निंतिं विडम्बना खः । पूवंक देय्या राजनीतिक व्यवस्था हे धरापय् लानाच्वंगु वर्तमान अवस्थाय् क्षणिक स्वार्थया निंतिं कांग्रेसया सभापति देउवां तयाच्वंगु चिधंगु स्वार्थं देय्यात गन यंकी धइगु बिचाः तकं मयाःगु सी दु। उकिं आःया अवस्थाय् संसद पुनर्स्थापन मजुल धाःसा उकिं गज्याःगु परिस्थितिइ देशय् वइ धकाः धायेफइगु अवस्था मदु ।

खः थौं प्रधानमन्त्री ओलीं संसद भंग याःगु छखे दुसा मेखे राष्ट्रियसभाया बैठकय् थः विरुद्ध सः थ्वयेवं न्ह्यानाच्वंगु राष्ट्रियसभाया बैठक नं प्यन्हु जक चले यानाः क्वचायेकेगु ज्या यात । थुकिं नं स्पष्ट सन्देश बियाच्वंगु दुकि थः विरुद्ध गुगुं नं कथंया विरोधया सः थ्वल धाःसा अज्याःगु संस्थायात गुलि फु उलि याकनं सुम्क तयेगु ज्या प्रधानमन्त्री ओलीं यानाच्वंगु दु। यदि राजनीतिक अवस्था थुकथं हे न्ह्याना वन धाःसा चुनावया म्हगस खनाच्वंम्ह देउवायात ध्याकुनय् लाकाः मेगुकथं राजनीतिक कोर्स न्ह्यःने न्ह्याकेगु ज्या नं ओली मयाइ धकाः धाये फइगु अवस्था मदु। आः थीथी प्रदेशय् थःगु पक्ष अल्पमतय् लायेवं उगु प्रदेशया संसद भंग यायेगु लँपुइ प्रधानमन्त्री ओली वनाच्वंगु दु। थ्व नं प्रतिगमनया मेगु चरण जुइ । आः नं हल्ला वयाच्वंगु दु। राष्ट्रपतिं चाहे जुल धाःसा प्रदेशसभा भंग जुइफु। तर संविधानतः राष्ट्रपतिं चाहे जुइवं प्रदेश संसद भंग यायेगु प्रावधान मदु। तर प्रतिनिधिसभा भंग यायेधुंकूम्ह प्रधानमन्त्रीं यदि सिफारिस यात धाःसा प्रदेशसभा भंग नं यायेगु निंतिं राष्ट्रपत न्ह्यमचिली धकाः धायेफइगु अवस्था मदु। प्रधानमन्त्रीं संसद भंग यायेवं उकियात कयाः सुयाकें सल्लाह तकं मयासें स्वीकृति बिउम्ह राष्ट्रपतिं आः नं अज्याःगु ज्या मयाइ धकाः धायेफइगु अवस्था मदु ।

अथेजुयाः थौंया आवश्यकता धइगु चुनाव मखु। भंग जूगु संसद पुनस्र्थापना खः । थुगु खँयात मनन यायेगु आवश्यकता कांग्रेसया देउवायात दु। मखु प्रतिगमनया मतियार जुइगु खःसा खँ मेता खः । राजनीतिक कोर्स करेक्सन यायेगु लँपुयात सर्वोच्च अदालतं संसद पुनर्स्थापना वा राजनीतिक आन्दोलन बाहेक मेता लँपु मदु ।

सम्बन्धित बुखँ

LEAVE YOUR COMMENTS