ओली सरकारयात हथ्या

स्वब्वय् निब्व सिबें अप्वः सांसद्तय्सं समर्थन याःगु एमालेया अध्यक्ष केपी शर्मा ओलीया सरकार आः न्यादँ तक लगातार रुपं संचालन जुइ अले देशय् यक्व विकास निर्माणया ज्या याइ धकाः धायेगु याना वयाच्वंगु दु । राजनीतिक क्रान्ति क्वचाल धासें आः देय्या नितिं आर्थिक समृद्धि हे मूल नारा खः धकाः धायेगु याना वयाच्वंगु इलय् यक्व विकास निर्माणया ज्या जुइ धकाः आशा याइगु स्वाभाविक नं खः । सरकार व सरकारया नेतृत्व यानाच्वंगु दलं हे आर्थिक समृद्धि व विकास निर्माणयात मूल विषय दयेका वनाच्वंगु अवस्थाय् सरकारय् दुथ्याःगु दल जक मखु सरकारं पिने च्वंगु राजनीतिक दलया नेतातय्सं नं यःसां मयःसां आर्थिक समृद्धि व विकास निर्माणया ज्यायात कयाः न्ववायेत बाध्य जुयाच्वंगु अवस्था दु । राजनीतिक दल व दलया नेता कार्यकर्तातय्गु दथुइ जक मखु कि सामाजिक ख्यःनिसें हरेक ख्यलय् हे सरकारं याइगु विकास निर्माणया बारे चर्चा जुयाच्वंगु दु ।

केन्द्रीय सरकार अर्थात संघीय सरकार एमालेया नेतृत्वय् दुगु अवस्था खःसा एमाले सहितया माओवादी दुथ्याःगु वामपन्थी गठबन्धनपाखें हे न्हय्गू प्रदेश मध्ये खुगू प्रदेशया सरकार गठन याःगु अले स्थानीय तहया सरकारय् नं बच्छिं मल्याक वाम गठबन्धनया हे बहुमत दुगु अवस्थाय् च्वंनिसें क्वय् तकं नं छगू दलयापिं वा छगू हे धारयापिं जनप्रतिनिधिपिं दुगुलिं ज्या यायेत अःपुइगु अवस्था दु धकाः धायेछिं । उकिं नं थ्व इलय् सर्वसाधारण नागरिकतय्सं तकं आः ला विकास जुइ धकाः आशा यानाच्वंगु दु । एमाले व माओवादी केन्द्र जानाः छगू कथं बर्चस्व कायम यानाच्वंगु अवस्थाय् नं ज्या याये मफुत धाःसा मेगु इलय् ला झन ज्या याये फइगु अवस्था हे दइ मखु धकाः तकं थुइकीगु स्वाभाविक हे खः । मुलुकय् संघीय संरचना कथं प्रदेश निर्माण जुइधुंकूगु व प्रदेशया सरकार तकं दयेकेधुंकूगु अवस्थाय् नं प्रदेश सरकारपाखें जनतां हिउपाःया अनुभूति याये फइगु कथंया ज्या याये मफयाच्वंगु अवस्था खःसा स्थानीय तहया सरकारं नं खास हे ज्या याये फयाच्वंगु मदु ।

अथे स्थानीय सरकारंनिसें प्रदेशया सरकार अले केन्द्रीय सरकारं तकं जनतां हिउपाः वःगु महसुस याये फइगु कथंया ज्या याये मफयाच्वंगुया कारण छु खः धकाः नं मनूतय्सं न्ह्यसः तयेगु यानाहःगु दु । स्वयेबलय् एमाले नेतृत्वया वर्तमान सरकारयात ज्या यायेत तसकं अःपु अले यकःति कथं हे न्ह्याः वने फइगु अवस्था खनेदुसां नं ओली सरकारयात थीथी कथंया हाथ्या नं मदुगु धाःसा मखु । आः वयाच्वंगु हाथ्यायात गुगु कथं चीका वनीगु खः वहे आधारय् जक ओली सरकार न्ह्याः वनी धकाः धाये फइगु अवस्था दु । उकिं थ्व इलय् ओली सरकारयात वयाच्वंगु हाथ्यायात कया चर्चा यायेगु सान्दर्भिक जुइ ।

१ नम्बर हाथ्या ः संविधान कथं प्रदेश सरकार, स्थानीय सरकार दयेके धुंकूगु अवस्थाय् आः गुगु कथं स्वंगू तहया सरकारया ज्या इनेगु अले च्वंनिसें क्वय्या तहतक गुकथं कर्मचारी व्यवस्थापन, आर्थिक स्रोतया परिचालन यायेगु ओली सरकारयात थ्व इलय् दकलय् तःधंगु हाथ्या जुयाच्वंगु दु । प्रदेश सरकारतय्पाखें थःपिनिगु नीति नियम दयेकेगु ज्या, केन्द्रीय सरकारपाखें याइगु आशा अले स्थानीय सरकारलिसे जाना वनेगु सवालय् गुज्वःगु कथं वनेगु धइगु बारे स्पष्ट जुया वनेमाःगु अवस्था दु ।

२ नम्बर हाथ्या ः न्हूगु संविधानयात संशोधन यायेमाः धकाः नेपाःया आदिवासी जनजाति, मधेसीनिसें उत्पीडित समुदायपाखें माग याना वयाच्वंगु दु । अले उमिगु भावना कथं संघीय समाजवादी फोरम नेपाल व राष्ट्रिय जनता पार्टीं माग तयाच्वंगु दु । थ्व निगू पार्टी धइगु नेपाःया न्यागू राष्ट्रिय पार्टीत मध्ये खः । थुगु निगू पार्टीया मागयात गुकथं सम्बोधन याइगु खः अले समग्र देश विकासया निंतिं उमिगु नं सहभागिता गुकथं यायेगु धइगु मेगु कथंया हाथ्या जुयाच्वंगु दु ।

३ नम्बर हाथ्या ः थ्व इलय् केन्द्रय् सरकार वामपन्थीया अले स्थानीय तहनिसें प्रदेशय् तकं बहुमत सिबें अप्वः थासय बाम गठबन्धनया हे सरकार जुयाच्वंगु दु । थ्व इलय् संघीय व्यवस्थाया हे विरोध यानाः आन्दोलन यानाच्वंगु विप्लबया नेतृत्वय् दुगु नेपाल कम्युनिष्ट पार्टी नं तःधंगु हाथ्या जुयाच्वंगु दु । जनप्रनिधितय्त राजीनामा बीत दबाब बिया वयाच्वंगु नापं छुं छुं कथंया अप्रिय घटना तकं जुयाच्वंगु अवस्था धइगु ओली सरकारया नितिं तःधंगु हाथ्या जुयाच्वंगु दु । यदि ओली सरकार विप्लब नेतृत्वया नेकपाया सवालय् गम्भीर मजुल धाःसा कन्हय् वनाः थ्व तःधंगु दीर्घकालिन हाथ्या जुया वइगु सम्भावना अप्वया वःगु दु ।

४ नम्बर हाथ्या ः आःया अवस्थाय् जःलाखःला देय् भारत व चीनयात गुगु कथं सन्तुलित याना वनीगु खः अले मेमेगु अन्तर्राष्ट्रिय शक्तिलिसे गुकथं स्वापू तया वनीगु खः उकिया आधारय् जक ओली सरकारयात ज्या यायेत अःपुइगु व थाकुइगु धाये फइ । उकिं अन्तर्राष्ट्रिय स्वापूयात कयाः नं ओली सरकारयात हाथ्या जुयाच्वंगु दु ।

थुगु कथंया हाथ्या नापनापं ओली सरकारया नितिं एमाले दुनेया आन्तरिक हाथ्यात नं मदुगु मखु । चुनावय् त्यायेधुंकाः दकलय् तःधंगु पार्टी जूगु अवस्थाय् यक्व नेता कार्यकर्तातय्सं आशा याइगु स्वाभाविक हे खः । अले उकिसनं माओवादी केन्द्रलिसेया एकताया प्रक्रिया न्ह्यानाच्वंगु अवस्थाय् थःगु हे पार्टीया नेता कार्यकर्तातय्त गुकथं व्यवस्थापन याना तयेगु
नापं माओवादी केन्द्रलिसे गुकथं एकता यायेगु धइगु नं तःधंगु हाथ्या खः । थुकथं वयाच्वंगु हाथ्यायात आः ओलीं गुकथं व्यवस्थापन याना वनीगु खः अले नेपाःयात समृद्धि नेपाः दयेकेगु नापं असन्तुष्ट पक्षया मागयात गुगु कथं सम्बोधन याना वनीगु खः उकिया आधारय् जक ओली सरकारया मूल्यांकन याये फइगु अले जनतां आशा याये फइ धकाः धाःसां छुं पाइ मखु ।