शान्तिया आवश्यकताया अनुभव

जब देय् कमजोर जुइ, देया सार्वभौम अखण्डता तक नं कमजोर जुयावनी। सार्वभौम अखण्डता कमजोरया अर्थ खः देय् स्वतन्त्रता जुइ मफयाच्वंगु दु धयागुया संकेत खः । देय् स्वतन्त्र मजुलकि व देय्यात विदेशी शक्तिं हस्तक्षेप यानां तुं च्वनी ।जब तक विदेशी शक्तिं हस्तक्षेप यानातुं च्वनी, व देय्या अवस्था झन झन नाजुक जुयावनाच्वनी ।

जब देय्या अवस्था नाजुक जुया वनाच्वनी, व देय्या बहुसंख्यक जनताया हालत नं अति खराब जुयाच्वनी । देय्या अखण्डता व राष्ट्रिय स्वतन्त्रता कमजोर जुइगु कारण नं निगू दु, छगू ला देशया हर्ताकर्ता नेतात विदेशी दलाल जुयाच्वनी, कि मखुसा मेगु कारण शक्तिशाली राष्ट्र थःगु सैनिक बलं कमजोर राष्ट्रयात मुठ्ठीइ तयेगु यानाच्वनी ।

निक्वःगु विश्व युद्ध अन्तया लिपा शक्तिशाली राष्ट्र कमजोर देय्यात सैनिक बलं अधिनय् तयेगु कुतः मयात । अथे धयागु रणनीति हिइकल । शक्तिशाली, धनी राष्ट्रं कमजोर राष्ट्रया नेतातय्त तन्त्रमन्त्र यानाः थःगु इशाराय् प्याखं हुइका च्वनेगु ज्या यानाच्वन । राष्ट्र शक्तिशाली जुइगु वा कमजार जुइगु नं जनताया ल्हातय् दु धकाः राजनीतिज्ञतय्सं अथें धाःगु मखु ।

यदि जनतां सही, विवेकी देशभक्त नेतातय्त म्हसिइके मफुत धाःसा दिवेशी दलाल नेतात अवश्य नं देशया उच्च पदय् थ्यनाच्वनी । जब नेतात विदेशी दलाल जुयाच्वनी, व नतोतय्सं विदेशया स्वार्थ पूर्तिया लागि देश घातक ज्या यानाच्वनी । यदि सकारात्मक सोच दुपिं नेतातय्त जनतां ल्ययेफत धाःसा नेतातय्सं कमसेकम देशयात उच्च विकास याये मफुसां नं देय्यात माःगु आधारभूत आवश्यक ता ला पूरा यानाः क्यनाबी ।

उत्तर कोरियाया नेता किम जोङ उन नं अझ छपलाः न्ह्याः वयाः युद्ध मखु शान्ति आवश्यकता महसुस यानाः दक्षिण कोरियालिसे शान्तिया लागि इनाप यात । किम जोङया पलाःयात विश्वया जनतां स्वागत यानाच्वंगु दु ।

जब थःगु देय्यात माःगु आधारभूत आवश्यक्ता पूरा जुइसातकि मेगु राष्ट्रं हेपे यायेगु ख्यायेगु आटँ यायेफइमखु । राजनीति विज्ञानया थथे धायेगु नं यानाच्वनी, दे परनिर्भर लानाच्वनकि व राष्ट्रयात मेमेगु राष्ट्र्र हेपे यायेगु यानाच्वनी । अझ थुलि जक मखु समान हैसियतया थाय् काये फइमखु । नेपाःया हालनत नं थथे जुयाच्वंगु दु । नेपाःया नेतात भारतया न्ह्यःने न्ह्याबलें नं लाचार जुयाच्वनेमाःगु अवस्था दु ।

कारण नेतात भारतमुखी जुयाच्वंगुलिं यानाः भारतया निर्भरय् च्वनेमाःगु अवस्था खः । नेपाःया प्राकृतिक श्रोतया सम्पत्तिं भारतया अर्थतन्त्रय् गुलि टेवा बियाच्वंगु दु धकाः भारतयाके भचा हे गुण मदु । अःखः नेपाःयात बरोबर दुःख कष्ट सास्ती बीगु यानाच्वनी । नेपाः थें तुं उत्तर कोरिया व दक्षिण कोरिया नं विदेशी शक्तिया प्रभावय् लानाचवंगु देश खः ।

उत्तर कोरिया विशेष यानाः चीन व रुसया प्रभावय् लानाच्वंगु खःसा दक्षिण कोरिया अमेरिकाया प्रभावय् लानाच्वंगु देश खः । तर थ्व निगू देशया नेतात विवेकी व देशभक्त जुयाच्वंगुलिं यानाः निगू कोरिया न थःथःगु तरिकां विकास यानाच्वंगु दु । उत्तर कोरियां कृषि विकासया नापनापं सैनिक शक्ति मजबूत यायेगुलिइ वनाच्वंगु दुसा दक्षिण कोरिया औद्योगिकरणया लँपुइ वनाः उच्च विकास यानाच्वंगु दु ।

निगू अलग अलग सिद्धान्त ज्वनाः शासन यानाच्वंपिं नेतात जूगुलिं यानाः छगू कोरियां मेगु कोरियात शत्रुभाव स्वयेगु तकं यानाच्वनी । निगू कोरियाया दथुइ युद्ध न्हापा थें जुल धाःसा अमेरिका,बेलायत, चीन व रुस नं युद्धय् सहभागी जुल धाःसा युद्ध भयानक जुयाः कोरिया जक मखु विश्व तकं विनास जुइफु धकाः विश्वया जनता ग्याःचिकु जुयाच्वंगु खः ।

अचानक वंगु वालय् निगू कोरियाया दथुइ शान्ति सम्झौता यानाः आः युद्ध गुबलें नं जुइमखुत धकाः नेतातय्सं प्रतिबद्धता याःगुलिं यानाः कोरियाया जनता जक मखु विश्वया जनतां तकं खुसी जुयाच्वंगु दु । कोरिया प्रायद्वीप न्हपां शक्तिशाली खःसां नं लिपा वया जापानं कोरियाया भूमियात कब्जा यानाः थःगु साम्राज्य फैलय् यानाच्वंगु खः ।

निक्वःगु विश्वयुद्ध लिपा तिनि अमेरिका व सोभियत संघं मिले जुयाः जापानयात पराजित यानाः छगू कोरियायात निगू कोरिया दक्षिण व उत्तर निर्माण यानाः उत्तर सोभियत संघया भागय् व दक्षिण कोरिया चाहिं अमेरिकाया भागय् लाकूगु खः । सन् १९५० सालपाखे हानं सोभियत संघ उत्तरयात उक्से यानाः दक्षिण कोरियायात आक्रमण याकाः राजधानी तकं कब्जा याकल ।

लिपा हानं अमेरिका व बेलायत सुरक्षा परिषदया आज्ञा कयाः आक्रमण यानाः दक्षिण कोरियायात बचे यायेत सफल जूगु खः । सन् १९५० या युद्धं कोरिया बर्बादया नापनापं करिब २० लाख जनताया मृत्यु जूगु घटनां यानाः कोरियाया जनता आः नं ग्याःचिकु जुयाच्वंगु दु । सन् १९५० सालया युद्धं निगू कोरियाय् यक्व धन व जन नाश जुल । पूर्वाधार विकास योजना ध्वस्त जुल । वया नापं नापं करिब २० लाख जनतां ज्यान गुमे यायेमाल ।

युद्ध अन्त लिपा उत्तरया नेता किम इल सुङ जुच्छे विचार धाराया अवधारणा ज्वनाः कृषि क्षेत्रय् अति उत्पादन यानाः जनताया आधारभूत आवश्यक्ता पूरा यानाः क्यनाबिल । किम इल सुङया मृत्यु लिपा वया काय किम जोङ यल सत्ताय् वल । किम इल नं देशया अखण्ड रक्षाया आवश्यक्ता न्हापांगु प्राथमिकता धकाः सैनिक शक्तियात मजबूतया लागि आधुनिक हतियार उत्पादनय् बृद्धि यानायंकल ।

अझ किम इलया काय किम जोङ उन नं बौया नीतिया अनुशरण यानाः आणविक हतियार व क्षेप्यास्त्र विकास यानाः अमेरिका पाखें सुरक्षित जुल । विश्वय राजनीति नं तःधंगु हिउपाः वयेगु सुरु जुल धयागु संकेत खनेदत । छाय्धाःसा शक्तिशाली राष्ट्रतय्सं नं शान्तिइ अप्वः ध्यान बियाच्वंगु दु धयागु प्रष्ट जुल । शान्तिया लागि अझ अमेरिकाया जनतां नं युद्ध मखु शान्ति माः धकाः शान्ति ¥याली यानाः सरकारयात सचेत यात ।

मेखे दक्षिण कोरियाया जनता जक मखु स्वयम राष्ट्रपति मुन जाय इन नं शानित्या पक्षय् खनेदु धयागु राजनीतिक घटनाक्रमं क्यनाबिल । उत्तर कोरियाया नेता किम जोङ उन नं अझ छपलाः न्ह्याः वयाः युद्ध मखु शान्ति आवश्यकता महसुस यानाः दक्षिण कोरियालिसे शान्तिया लागि इनाप यात । किम जोङया पलाःयात विश्वया जनतां स्वागत यानाच्वंगु दु ।

 

सम्बन्धित बुखँ

LEAVE YOUR COMMENTS