मैत्रेय युवाया २१ क्वःगु वार्षिकोत्सव

ख्वप – मैत्रेय युवा संघया २१ क्वःगु वार्षिकोत्सव ज्याझ्वः जुल । मस्त, ल्याय्म्ह व विद्यार्थी वर्गयात बुद्धशिक्षाया माध्यमं चेतना बीगु व समाजय् न्यनाच्वंगु अन्ध परम्परा, विकृति सुधार यानाः वनेगु तातुनाः गठन जूगु संघया वार्षिकोत्सव जयकीर्ति विहार, थथुबहिलिइ जूगु खः ।पंचशील ग्रहण यानाः शुरु जूगु ज्याझ्वःया उलेज्या मूपाहांकथं बिज्याःम्ह भिक्षु पञ्ञासारं याना बिज्याःगु खःसा ज्याझ्वलय् सत्यलक्ष्मी रंजितं लसकुस यानादीगु खः ।परियत्ति शिक्षाया अध्ययन व अभ्यासयात प्राथमिकता बियाः न्ह्याःगु ज्याझ्वलय् विद्यार्थीतय् नैतिक विकास यायेगु आज्जु तयाः स्थानीय शिक्षाया पाठ््यक्रमय् परियत्ति शिक्षाया रुपय् नैतिक शिक्षा दुथ्याकेगु सम्बन्धय् ख्वप नगरपालिकाय् पेश याःगु प्रस्तावयात सुलोचना क्वजुं थःगु नुगःखँ तयादीगु खः ।अनागरिका ञाणवति गुरुमां नं परियत्ति शिक्षा नापं ध्यान अभ्यासं झीत पेटिवेधया अवस्थाय् थ्यंकीगु विश्वास प्वंका बिज्याःगु मुनि विहारया अर्जुन भन्ते नं परियत्ति शिक्षाया प्रभाव लिबाक्क जक लाःगु खने दइ धयाबिज्यासें थ्व शिक्षायात व्यवहारय् लागू याये फत धाःसा चरित्र सुधार जुयाः समाजय् बांलाःगु प्रभाव लाइ धयाबिज्यात ।

तीर्थराज वज्राचार्यं स्थानीय शिक्षाया पाठ््यक्रमय् परियत्ति शिक्षाया आवश्यकतायात कयाः थःगु नुगःखँ प्वंकादीगु खः । अथे हे अखिल नेपाल भिक्षु महासंघपाखें संचालन जुयाच्वंगु परियत्ति शिक्षा संचालन जुयाच्वंगु थीथी विद्यालयया केन्द्राध्यक्षपिंसं परियत्ति शिक्षाया महत्व, उकिया गतिविधि व योजना बारे थःथःगु नुगःखँ तयादीगु खः ।बौद्ध विद्वान् सविता धाख्वां नं परियत्ति शिक्षाया महत्वयात कयाः नवानादीगु ज्याझ्वलय् सनसाइन इंग्लिश स्कुलया पुण्य ढकाल, एभरेष्ट इंग्लिश स्कुलया सलिना वज्राचार्य, इजि पायोनियर इग्लिश स्कुलया विजय ध्वँजुपिंसं थःथःगु स्कुलय् संचालन जुयाच्वंगु परियत्ति शिक्षा व उकिया प्रभावया बारे जानकारी बियादीगु खः ।भिक्षु पियरत्नं दिवंगत भिक्षु धम्मपाल महास्थविरया लुमन्तिइ वसपोलया बःचाः हाकःगु म्हसीका बियाबिज्यासें वसपोलया लुमन्तिइ छगू मिनेट मौन धारण नं याःगु खःसा मुनि विहारय् ताःई न्ह्यवंनिसें सेवा याना वयाच्वनादीम्ह कृष्णबहादुर बासी मदुगु लमुन्तिइ वय्कःयात नं श्रद्धाञ्जली देछाःगु खः । उगु ज्याझ्वलय् परियत्ति शिक्षा संचालनया निंतिं ग्वाहालि यायेकथं रत्नायन परिवारया दानमाया शाक्यं ५१,०००÷– ग्वाहालि यानादीगु खःसा संघयात आर्थिक ग्वाहालि यानादीपिंत चैत्य उपहार नं लःल्हाःगु खः ।संघया नायः संचित बुद्धाचार्यया सभापतित्वय् जूगु ज्याझ्वलय् उपसचिव प्रमिला धुख्वां वार्षिक प्रतिवेदन व जमुना गोसाईनं आर्थिक प्रतिवेदन न्ह्यब्वयादीगु खः ।