ने. सं. ११४४ कौलाथ्व पारू - नःलास्वनेगु

देय् दबूयात नेवाः अधिकार सिरपाः

येँ- नेवाः देय् दबूयात आइतवाः छगू ज्याझ्वःया दथुइ थुगु दँया नेवाः अधिकार सिरपाः लःल्हात । ज्याझ्वःया मूपाहां लिसें जनकवि दुर्गालाल श्रेष्ठं देय् दबूया नायः पवित्र वज्राचार्ययात उगु सिरपाः लःल्हानादीगु खः ।

ज्याझ्वलय् न्ववासें जनकवि दुर्गालाल श्रेष्ठं देय् दबूपाखें सिरपाः कया थें नेवाःतय् भाषा, जातिया ख्यलय् न्ह्यथनेबहःगु ज्या यानाः क्यना बिल धाःसा थुकिं सिरपाः नं सार्थक जुइगु खँ कनादिल ।

सिरपाः लःल्हानाः कयादिसें देय् दबूया नायः पवित्र वज्राचार्यं सिरपाः थम्हं ग्रहण यानाः कयाच्वनागु खःसां थुकिया श्रय धइगु थः स्वयां न्ह्यःयापिं देय् दबूया नायःपिंत बीमाःगु व वय्कःपिंसं यानादीगु ज्याया कदर कथं हे थ्व सिरपाः देय् दबूयात लाःगु खः धयादिल । ज्याझ्वःया सभापति लिसें नेवाः अधिकार सिरपाःया दाता डा. महेशमान श्रेष्ठं नेवाः अधिकार चूलाकेगु आन्दोलनया झ्वलय् योगदान याना वयाच्वंपिं व्यक्ति व संस्थायात बीगु ल्याखं थ्व सिरपाः नीस्वनागु खँ कनादिल ।

ज्याझ्वलय् ल्यज्या पुचःया कजि डा. पुष्पराज राजकर्णिकारं वंगु २७ दँ न्ह्यः नीस्वंगु नेवाः देय् दबुलिं नेवाः स्वायत्त राज्यया लागिं तःजिक आन्दोलन याःगु व देशय् न्हूगु संविधानयात समावेशी दयेकेगु अभियानय् नं तःजिक पलाः न्ह्याकूगु खँ न्ह्यथँसें थ्व संस्थां याना वःगु थुपिं ज्याखँया कदर यासें थुगु सिरपाः लःल्हानागु खः धयादिल ।

ज्याझ्वलय् नेवाः अधिकार सिरपाः समितिया दुजः शाक्य सुरेनं लसकुस यानादीगु खःसा समितिया ग्वाहालि पुचःया दुजः डा. मनोजमान श्रेष्ठं सुभाय् देछानादीगु खः । सिरपाःया दाता मय्जु मोहिनी श्रेष्ठं देय् दबूयात सिरपाः कथं न्यय्द्वः (५० हजार) तका दां लःल्हानादीगु खः । ज्याझ्वलय् नेवाः देय् दबूया मुँज्याय् ब्वति काः झाःपिं थीथी जिल्लाया प्रतिनिधिपिनि नं उपस्थिति दुगु खः ।