महानगरपाखें वज्रयान महाविहारयात थप आर्थिक ग्वाहालि
येँ(नेपालभाषा टाइम्स)÷येँ महानगरपालिकां लुम्बिनीइ निर्माण जुयाच्वंगु नेपाल वज्रयान महाविहारयात थप आर्थिक ग्वाहालि लःल्हाःगु दु । महानगरं महाविहारया कलात्मक सौन्दर्यता अप्वयेकेत छगू करोड ५० गू लख थप आर्थिक ग्वाहालि याःगु खः ।
छुं दिं न्ह्यः जूगु छगू ज्याझ्वःया दथुइ येँ महानगर प्रमुख विद्यासुन्दर शाक्यं महाविहारया प्रमुखलिसें नेपाल परम्परागत बौद्ध धर्म संघया नायः बौद्ध विद्वान प्रा.डा. नरेशमान वज्राचार्ययात उगु आर्थिक ग्वाहालि लःल्हानादीगु खः । उगु इलय् महानगर प्रमुख शाक्यं महाविहारया निंतिं ६० प्रतिशत ग्वाहालिया चेक लःल्हानादीगु खः ।
लुम्बिनी विकास कोषया गुरुयोजना अन्तर्गत नेपाःया सम्पदा प्रतिविम्बित यायेगु उद्देश्यं निर्माण जूगु महाविहारया निंतिं येँ महानगरपालिकां थ्व स्वयां न्ह्यः नं थीथी चरणय् यानाः प्यंगू करोड २९ गू लख झिंच्याद्वः तका ग्वाहालि यायेधुंकूगु दु ।
महाविहार निर्माणया झ्वलय् आतक १६ गू करोड खर्च जुइधुंकूगु व उकियात पूर्ण रुपं निर्माण यायेत अझं प्यंगू करोड आवश्यक जूगु ज्याझ्वलय् जानकारी बिउगु दु ।
ग्वाहालि लःल्हानादिसें महानगर प्रमुख शाक्यं विदेशीतय्सं दयेकूगु विहारय् नेपालीपन व नेपाःया शैली दइमखु धासें नेपालय् निर्माण जुइगु विहारय् नेपाःया हे लगानी जुइमाःगु खँय् बः बियादिल ।
नेपाःया विहारय् नेपालीपन हे दयेमाःगु व उकी नेपाःया शैली नं पिज्वयेमाः धासें उकिया निंतिं हे थःपिंसं महाविहारय् लगानी यानागु वय्कलं स्पष्ट यानादिल ।
महाविहारया प्रमुख प्रा. डा. वज्राचार्यं गुगुं नं भिंगु ज्या यायेबलय् सगं कायेगु चलन दु थें महानगरं बिउगु आर्थिक ग्वाहालि नं महाविहारया निंतिं सगं हे जूगु प्रतिक्रिया बियादिल । लिसें वय्कलं नेपालय् थःगु हे पनया विहार दयेकेगु थःपिनिगु नं दायित्व खः धइगु खँयात वाः चायेकाः विहार निर्माणया ज्या न्ह्याकागु जानकारी बियादिल ।
नेपालय् वंगु ३७२ दँ न्ह्यवनिसें नेपाली वास्तुकला, बौद्ध कलाया विहार निर्माण मजुयाच्वंगु थासय् महानगरया ग्वाहालिं थ्व सम्भव जूगु वय्कःया धापू दु ।
LEAVE YOUR COMMENTS