चीनय् नेपाःमि कायेत कन्हय् विमान वनीगु

येँ – चीनया थीथी सहरय् च्वंपिं नेपाःमि विद्यार्थीयात उद्धार यायेगु निंतिं नेपाल वायुसेवा निगमया जहाज कन्हय् न्हिनय् चीनया वुहान वनेत्यंगु दु । चीनया थीथी सहरय् च्वंपिं १८० म्ह विद्यार्थीयात उद्धार यायेगु निंतिं उगु जहाज चीन वनेत्यंगु खः । वुहानं नेपाःमि विद्यार्थीयात कयाः जहाज आइतवाः त्रिभुवन अन्तर्राष्ट्रिय विमानस्थलय् थ्यनीगु खँ धाःगु दु । वुहान वनीगु पुचलय् स्वम्ह पाइलट, खुम्ह क्याबिन क्रु, निम्ह इन्जिनियर, छम्ह फ्लाइट डिस्प्याचर व छम्ह लोडमास्टर लिसें नेपाली सेनाया प्यम्ह चिकित्सक दुथ्याइगु खँ धाःगु दु ।

जहाज नेपाः लिहां वयेधुंकाः अन्तर्राष्ट्रिय हवाई उड्डयन प्राधिकरण आइकाओया नियम कथं ४८ घौ तक उडान याये मजिउगु खँ धाःगु दु ।
चीनं नेपाः हइपिं विद्यार्थीयात सरकारं ख्वपया खरिपाटीइ च्वंगु नेपाल विद्युत प्राधिकरणया भवनय् तयेगु तयारी यायेधुंकूगु दु । सरकारं चीनं उद्धार यानाहःपिं नेपाःमियात झिंप्यन्हु निसें झिंन्हय्न्हु तक क्वारेन्टाइनय् च्वनेमाःगु बाध्यात्मक व्यवस्था यानातःगु दु ।

लिसें चीनं उमित नेपाः हयेगु झ्वलय् नं उपिं कोरोना भाइरसं संक्रमित जू वा मजू धकाः स्वास्थ्य परीक्षण याइगु खँ धाःगु दु । यदि स्वास्थ्य परीक्षणया झ्वलय् भाइरसया लक्षण खनेदत धाःसा संक्रमित विद्यार्थीयात चीनय् हे आइसोलेसनय् तयाः वासः यायेगु व वयां लिपा नेपाः हयाः त्रिभुवन विमानस्थलय् परीक्षण याइगु खँ धाःगु दु ।

विमानस्थलय् परीक्षण यायेबलय् लक्षण मखन धाःसा विमानस्थलं तप्यंक क्वारेन्टाइनय् यंकाः तयेगु व लक्षण खनेदत धाःसा एम्बुलेन्सय् तयाः अस्पतालया आइसोलेसन वार्डय् तयेगु व्यवस्था सरकारं यानातःगु दु ।

सम्बन्धित बुखँ

LEAVE YOUR COMMENTS