महानगरया सतकय् स्मार्ट जेब्रा क्रसिंग

येँ – स्वनिगःया आपालं सतकय् लँ त्वाःल्हायेत जेब्रा क्रसिंग तयातःसां छखे थौंकन्हय् अज्याःगु जेब्रा क्रसिंग सीमदया वनेधुंकूगु दुसा मेखे सी दुगु थासं लँजुवाःतय् लँ त्वाःल्हायेगु यानाच्वंगु मदु । येँ महानगर लागाय् जक सछिगू स्वयां अप्वः थासय् अज्याःगु परम्परागत जेब्रा क्रसिंग तयातःगु दुसां लँजुवाःतय्सं थःत गनं छिं अनं हे लँ त्वाःल्हायेगु याना वयाच्वंगु दु ।

आः वयाः येँ महानगरपालिकां स्मार्ट जेब्रा क्रसिंग निर्माण यायेगु तयारी याःगु दु । येँ मनपाया सछिगू स्वयां अप्वः थासय् दुगु परम्परागत जेब्रा क्रसिंग स्वनिगःया जनसंख्याया चापया ल्याखं थ्व तसकं म्हो खः । गुलि थासय् ला जेब्रा क्रसिंग खने मदयाः दु धइगु अनुमान जक याये फइगु अवस्था दु ।

थ्व हे कारणं आः येँ मनपां लँजुवाःतय् अप्वः चाप दइगु थासय् स्मार्ट जेब्रा क्रसिंग निर्माण यायेगु तयारी याःगु खः । येँ मनपाया प्रवक्तालिसें येँ मनपा १५ वडाअध्यक्ष ईश्वरमान डंगोलं सडक विभागलिसे सहकार्य यानाः मनूत यक्व जुइगु थासय् स्मार्ट जेब्रा क्रसिंगया निंतिं ज्या न्ह्याकेगु जुइ धयादिल ।

वय्कलं थ्व स्वयां न्ह्यः न्ह्यागुकथंया निर्माण जुयाच्वंगु खःसां आः निर्माण यायेगु दक्वं जेब्रा क्रसिंग स्मार्ट हे जुइ धयादिल । येँ मनपां न्हू निर्माण याइगु जेब्रा क्रसिंग आधुनिक प्रविधिया जुइगु व निगू लेनं वइगु सवारी साधनं १० मिटर न्ह्यःने थ्यंकाः थः हे दीगु प्रविधि सहितया जुइगु जानकारी वय्कलं बियादिल ।

वय्कलं धयादिल, ‘लँजुवाःत लँ त्वाःल्हायेत सतकय् न्ह्यःने वयेधुंकाः ट्राफिक प्रहरी संकेत बियाः व ल्हाः बियाः, सिट्टी पुयाः सवारी साधन दिकाच्वनेमालीमखु, प्रविधिं हे उकियात पनाबी ।’येँ मनपां चालु आर्थिक दँया निंतिं विनियोजन याःगु १३ गू अर्ब २ गू करोड १२ गू लाख स्वीन्हय्द्वः तका बजेटय् भौतिक पूर्वाधार निर्माणया निंतिं जक प्यंगू अर्ब खुगू करोड विनियोजन याःगु खः ।

उकी दकलय् अप्वः येँ महानगर लागा दुनेया सतक विस्तार व मर्मतया निंतिं खर्च याइ । येँ मनपा दुने जक १,४५० किलोमिटर सतक दुसा उकी मध्ये ८ मिटर स्वयां म्हो ब्या दुगु सतक मर्मत यायेगु अधिकार येँ मनपायात दु । मनपां दयेकेत्यंगु थुकथंया न्हूगुलिसें पुलांगु जेब्रा क्रसिंगयात बहनिसिया इलय् नं स्पष्ट रुपं खने दइकथं मर्मत यायेगु मनपां न्ह्यथंगु दु ।

 

सम्बन्धित बुखँ

LEAVE YOUR COMMENTS