शून्य डिग्रीया ख्वाउँ सह यानाः द्वलंद्व आप्रवासीत बेलारुस व पोल्यान्डया सीमाय्
एजेन्सी- बेलारुसलिसे स्वाःगु पूर्वी सीमाय् थःगु देशय् दुहां वयेत स्वयाच्वंपिं द्वलंद्वः आप्रवासीतय्त पोल्यान्डं सीमाय् हे पनाबिउगु दु । शून्य डिग्रीया ख्वाउँ सह यानाः द्वलंद्व आप्रवासीत पोल्यान्ड दुहां वनेत बेलारुस व पोल्यान्डया सीमापाखे मूवःगु खः ।
पोल्यान्डं बेलारुसया राष्ट्रपति एलेक्जेन्डर लुकाशेन्कां उक्से यानाः आप्रवासीतय्त सीमाय् छ्वयाहःगु द्वपं बिउगु दु । बेलारुसय् तयातःगु अन्तर्राष्ट्रिय प्रतिबन्धं हीमी चाःम्ह लुकान्सेन्कां हे उक्से यानाः आप्रवासीतय्त सीमाय् छ्वयाहःगु धासें पोल्यान्डं थुकियात ‘शत्रुतापूर्ण ज्या’ धकाः धाःगु दु ।
आप्रवासीतय्त पनेगु निंतिं पोल्यान्डं १२ हजार सेना पूर्वी सीमाय् खटे यायेधुंकूगु दु । सामाजिक सञ्जालय् खनेदगु भिडियोय् सलंसः मनूत सीमाय् तयातःगु तारबार न्ह्यःने खनेदयाच्वंगु दुसा उपिं अन तयातःगु थज्याःगु पंगः त्वाःथलाः न्ह्याः वनेत स्वयाच्वंगु खनेदु ।
बेलारुसया सीमा जुयाः छुं ई न्ह्यवनिसें गैरकानुनी रुपं आप्रवासीत दुहां वयेत स्वयाच्वंगु खँ पोल्यान्ड, लिथुआनिया व लाट्भियां धाःगु दु । थुपिं आप्रवासीत अप्वः थें मध्यपूर्व व एसियां वःपिं खः ।
बेलारुस व पोल्यान्डया पूर्वी सीमाया मौसम थौंकन्हय् शून्य डिग्री स्वयां क्वय् थ्यनाच्वंगु दु । थज्याःगु ख्वाउँगु थासय् थ्यंपिं आप्रवासीतय् स्वास्थ्यय् समस्या वयाच्वंगु दुसा ख्वाउँया कारणं छुं आप्रवासीत सीधुंकूगु खँ नं धाःगु दु ।
सीमाय् थ्यंपिं आप्रवासीतय्त पोल्यान्डं दुकाये चाहे मजूगु व बेलारुसं नं लित काये चाहे मजूगुलिं थुपिं ख्वाउँगु जंगलय् हे अलपत्रय् लानाच्वंगु दु ।
थ्वहे दथुइ जर्मनीया आन्तरिक मामिला मन्त्रीं पोल्यान्डया सीमा सुरक्षित यायेत एकीकृत पलाः न्ह्याकेत युरोपेली संघयात इनाप याःगु दु । थ्वयां न्ह्यव अमेरिकी विदेश मन्त्रालयया प्रवक्तां नं बेलारुसं जबर्जस्ती आप्रवासी लहर ब्वलंकेगु कुतः याःगु द्वपं बिउगु खः ।
बेलारुसया राष्ट्रपति लुकाशेन्कां धाःसा थुकियात अस्वीकार याना वयाच्वंगु दु ।
LEAVE YOUR COMMENTS