अक्सफोर्डया खोपयात बेलायतय् स्वीकृति

एजेन्सी – न्हूगु ताजिया कोरोना भाइरस संक्रमणया मारय् लानाच्वंगु बेलायतं कोरोनाविरुद्धया मेगु छगू खोपयात नं अनुमति बिउगु दु । बेलायतया हे अक्सफर्ड विश्वविद्यालय व एन्ट्राजेनेका जानाः दयेकूगु थ्व खोपयात अनुमति बिउगु खः । थ्व खोप तसकं म्हो तापक्रमय् भण्डारण यायेमाःगु बाध्यता मदुगुलिं थुकियात याउँक छ्यलाबुला यायेफइगु खँ धाःगु दु । बेलायती सरकारं थ्व खोपया १० करोड मात्रा अर्डर नं यायेधुंकूगु दु । बेलायत सरकारं थ्वयां न्ह्यव अमेरिकाया फाइजर व बायोएन्टेकं दयेकूगु खोपयात दकलय् न्हापां स्वीकृति बिउगु दु ।

बेलायतया स्वास्थ्य मन्त्रीं वइगु जनवरी ४ तारिख निसें न्हूगु खोप नं बीगु सुरु यायेगु खँ धाःगु दु । अक्सफोर्ड व एक्ट्रोजेनेकां दयेकूगु थ्व खोप दकलय् न्हापांगु वंगु अप्रिलय् छम्ह स्वयंसेवकयात परीक्षण याःगु खः । थ्व लिपा हजारौ मनूत सहभागी यानाः तःधंगु स्तरय् क्लिनिकल परीक्षण सुरु याःगु खः । बेलायतय् आःतकया दुने खुगू लाख मनूतय्सं फाइजर-बायोएन्टेकं विकास याःगु खोप कायेधुंकूगु दु । अक्सफोर्ड व एस्ट्रोजेनेकां दयेकूगु खोप दंगु व छक्वलं यक्व मात्राय् उत्पादन यायेफइगु जूगुलिं थ्व खोप यक्व मनूतय्सं काइगु आशा यानातःगु दु ।

थ्व हे दथुइ चीनया सिनोफार्मं दयेकूगु खोप स्वंगूगु चरणया परीक्षण लिपा ७९ प्रतिशत प्रभावकारी खनेदुगु खँ धाःगु दु । अथेहे बायोएन्टेक व मोर्डनां दयेकूगु खोप नं प्रभावकारी जूगु समाचार वयाच्वंगु दु ।