आः प्रदेश-प्रदेशय् नं गडबड शुरु
येँ (नेपालभाषा टाइम्स) – प्रधानमन्त्री केपी शर्मा ओलीं संघीय संसद विघटन यायेवं आः उकिया हे लिच्वः कथं प्रदेशसभाय् नं अविश्वासया प्रस्ताव दर्ता जुइगु क्रम शुरु जूगु दु । थ्वहे झ्वलय् प्रदेश १ य् मुख्यमन्त्री शेरधन राईया विरुद्ध अविश्वासया प्रस्ताव दर्ता जूगु दु ।
नेकपा विभाजन लिपा ओली पुचःया मुख्यमन्त्री राई विरुद्ध प्रचण्ड-माधव नेपाल पुचलं म्हिगः अविश्वासया प्रस्ताव दर्ता याःगु खः । मुख्यमन्त्री राईयात् प्रदेशया नां तये मफुगु, विलासी गाडी न्यायेगु ज्याय् मुख्यमन्त्री केन्द्रित जूगु, सांसदयात भूमिका बिहिन यानाः जनताया अपेक्षा कथं ज्या यायेमफुगु द्वपं बिसें अविश्वासया प्रस्ताव तःगु खः ।
थ्व स्वयां न्ह्यः बागमती प्रदेशया मुख्यमन्त्री डोरमणि पौडेलया विरुद्ध अविश्वासया प्रस्ताव दर्ता याःगु खः । पौडेलया विरुद्ध प्रदेश इन्चार्ज अष्टलक्ष्मी शाक्यया नेतृत्वय् अविश्वासया प्रस्ताव दर्ता जूगु खः । प्रदेश १ य् थौं जक मुख्यमन्त्री विरुद्ध अविश्वास प्रस्ताव दर्ता यायेगु लागिं प्रचण्ड-नेपाल पुचलं तयारी यानाच्वंगु खःसा मुख्यमन्त्री राईं शनिवाः हे आर्थिक मामिला मन्त्री इन्द्रबहादुर आब्बोयात बर्खास्त यायेवं मुख्यमन्त्री विरुद्ध नं म्हिगः हे अविश्वास प्रस्ताव दर्ता याःगु खः ।
थीथी प्रदेशय् ओली व प्रचण्ड-माधव पक्षया दथुइ अविश्वासया प्रस्ताव तयेगु ज्या जुयाच्वंसां गण्डकी प्रदेशय् धाःसा अज्याःगु छुं संकेत खनेमदु। वंगु शनिवाः च्वंगु प्रदेशस्तरीय बैठकय् तकं सरकारया विरुद्ध छुं नं कथंया निर्णय जूगु मदु । गण्डकी प्रदेशया मुख्यमन्त्री विरुद्ध अविश्वासया प्रस्ताव हयेगु निंतिं प्रचण्ड-नेपाल पक्षयाके माःगु बहुमत मदुगुलिं सरकारं नं मत्वःतेगु व अविश्वासया प्रस्ताव नं महयेगु कथं न्ह्याः वनाच्वंगु दु ।
प्रदेशया मुख्यमन्त्री पृथ्वी सुब्बा गुरुङं संघय् न्ह्यागु हे जूसां प्रदेशय् धाःसा मिले जुयाः सरकार चले यायेगु प्रस्ताव यानादीगु दु । गण्डकी प्रदेशय् ओली पुचःया बहुमत मदुगुलिं सरकारयात निरन्तरता बीत नं मिले जुयाः सरकार चले यायेगु बाहेक मेगु विकल्प मदुगु खँ धाःगु दु ।
मेखे लुम्बिनी प्रदेशय् नं मुख्यमन्त्री शंकर पोखरेल विरुद्ध अविश्वासया प्रस्ताव वयेफुगु खँ धाःगु दु । पार्टी विभाजन जुल धाःसा अन वय्कःया पक्षय् बहुमत दइगु सम्भावना म्हो जक दु ।
LEAVE YOUR COMMENTS