माघ ३० गते दुने बहस क्वचायेकत इनाप

येँ -प्रधानन्यायाधीश चोलेन्द्र शम्शेर जबरां संसद विघटन मुद्दाय् थःगु बहस माघ ३० गते दुने क्वचायेकेत सरकारी पक्षयात इनाप याःगु दु । संसद विघटन मुद्दाय् दर्ता जूगु झिंस्वंगू रिटय् विपक्षी दयेकातःपिं राष्ट्रपति ज्याकू, प्रधानमन्त्री व मन्त्रिपरिषद ्ज्याकू, प्रधानमन्त्री केपी ओली शर्मासहित विपक्षीया कानुन व्यवसायीपिंत वइगु शुक्रवाःया दुने बहस क्वचायेकेत प्रधानन्यायाधीशं इनाप यानादीगु खः ।

म्हिगः प्रधानमन्त्रीया प्रतिरक्षाया निंतिं बहस यायेत वःम्ह रमेश बडालयात प्रधानन्यायाधीश जबरां माघ ३० गते दुने विपक्षीपाखें बहस क्वचायेकेमाःगु खँ धयादीगु खः । लिसलय् अधिवक्ता बडालं प्रधानमन्त्रीया अदालतं निर्धारण याःगु इलय् बहस क्वचाइगु खँ धयादीगु दु । प्रधानन्यायाधीश जबरां प्रधानमन्त्रीया जक मखुसें फुक्कं विपक्षीपाखें बहस थ्व वाःया दुने क्वचायेकेमाः धकाः धयादीगु दु । प्रधानन्यायाधीश जबरां धयादी,‘जिमिसं छिकपिंत बियागु बहस यायेगु म्याद माघ १९ गते निसें ३० गते तक फुकसियांपाखे बहस क्वचायेकेमाः ।’

प्रधानन्यायाधीश जबरां न्ह्यःने धयादी, ‘आः ग्वाहालि याइपिं वरिष्ठ अधिवक्तापिंत नं ई बी माल, वयां लिपा जिमित नं छुं ई माली ।’ वय्कलं सरकारी पक्षयात थ्व स्वयां न्ह्यः ई क्वःमछिउगु खःसा आः ई म्हो जक दुगुलिं ई क्वःछी माःगु खँ धयादीगु दु । प्रधानमन्त्री केपी शर्मा ओलीं संसद विघटन याःगु विरुद्ध राष्ट्रपति कार्यालय, प्रधानमन्त्री तथा मन्त्रिपरिषद्या कार्यालय, प्रधानमन्त्री सभामुखयात विपक्षी दयेकाः रिट दायर यानातःगु खः ।

आइतवाः तक संसद विघटनया प्रतिरक्षाय् सरकारी पक्षपाखे सरकारी वकिलं जक बहस यायेगु ज्या क्वचायेकूगु दु । आः संसद विघटनया रिटय् सरकारया प्रतिरक्षा यायेत वकालतनामा च्वकूपिं निजी कानुन व्यवसायीतय्सं बहस यायेगु ल्यं दनि ।